Чаму Лукашэнка так баіцца за сваю бяспеку

Праз удзелу ў адкрыцці «Дынама» дыктатара на стадыён неабходна было прыходзіць мінімум за гадзіну да цырымоніі.

Лукашэнка 21 ліпеня наведаў абноўлены стадыён «Дынама» і нават паглядзеў там палову футбольнага матчу. Звярнула на сябе ўвагу тое, як было арганізавана гэта мерапрыемства, паведамляе «Салiдарнасць».

Выступаючы перад прысутнымі, Лукашэнка захапляўся поўнымі трыбунамі.

- Я вельмі рады, што сёння няма свабодных месцаў на гэтым стадыёне, - заявіў падчас урачыстага адкрыцця Лукашэнка.

Пікантнасць сітуацыі ў тым, што за запаўненне трыбун неслі абавязак «адказныя людзі» і паглядзець матч разам з Лукашэнкам можна было толькі па запрашальных.

Больш за тое, зроблены былі небывалыя меры бяспекі. Праз удзел у мерапрыемстве Лукашэнкі на стадыён неабходна было прыходзіць мінімум за гадзіну да пачатку цырымоніі!

У гэтай сувязі я прыгадала нядаўнюю паездку ў Бэрлін на семінар «Футбол і культура футбольных заўзятараў у адкрытым грамадстве». Было вельмі цікава, як жа ў Нямеччыне гарантуюць бяспеку вышэйшых службовых асоб, якія наведваюць спартыўныя мерапрыемствы? Тым больш што я мела магчымасць пабываць адразу на некалькіх стадыёнах Бэрліна.

У ліку якіх быў і «Олімпіяштадыён» - на яго часцяком зазірае кіраўніцтва Нямеччыны, уключаючы канцлерку Ангелу Мэркель і федэральнага прэзідэнта Франка-Вальтэра Штайнмаера. Тут жа на VIP-трыбуне сядзеў Папа Рымскі Бенедыкт XVI, калі наведваў краіну ў 2011 годзе. Вось гэта месца пад нумарам 1.

Заўважце, што нават у плане раскошы крэслы для Мэркель, Папы Рымскага ды іншых VIP-персон сусветнага ўзроўню моцна саступаюць мяккім сядзенням для беларускага кіраўніцтва.

Не кажучы ўжо пра меры бяспекі на VIP-трыбуне. Ад астатніх заўзятараў беларускія віпы адгароджаныя высокім і, не выключана, куленепрабівальным шклом. Тады як на нямецкім алімпійскім стадыёне абышліся звычайнымі металічнымі перагародкамі.

Але, можа, тады асаблівая ўвага нададзеная самай ахове стадыёна ў Бэрліне, калі там з'яўляюцца высокія госці? Я задала гэтае пытанне кіраўніку службы бяспекі «Олімпіяштадыён».

- На маю працу гэта не ўплывае, - растлумачыў ён. - Я толькі паказваю маім калегам са службы аховы гэтых палітыкаў, як зарыентавацца на мясцовасці, як прайсці ў ложу і іншыя нюансы. Але я не займаюся аховай непасрэдна палітыкаў.

Натуральна, пра запаўненне заўзятарамі стадыёна за гадзіну да прыезду Мэркель або, тым больш, пра спецыяльна запрошаных на матч людзей, размовы тут нават не ідзе.

А што ж паліцэйскія? Іх падчас матчу на стадыёне наогул няма – незалежна ад таго, хто сядзіць на VIP-трыбуне. Паліцыянты могуць з'явіцца толькі ў выпадку, калі на матчы адбыўся нейкі інцыдэнт (а так яны на вочы заўзятарам нават не паказваюцца).

У паліцэйскім участку №22 Бэрліна, пад юрысдыкцыяй якога знаходзіцца «Олімпіяштадыён», растлумачылі, што іх дзеянні залежаць ад ступені рызыкі, якая прысвойваецца кожнаму футбольнаму матчу: па шкале ад 1 да 4-х. Але ўплывае на гэта не персона на VIP-трыбуне, а магчымасць беспарадкаў. І тут ужо глядзяць выключна на заўзятараў, прысвойваючы ім катэгорыі ад А (спакойныя, якія проста прыйшлі паглядзець матч) да С (фанатаў, якія едуць, каб пабіцца).

Гэта значыць, паліцыянты галоўным у сваёй працы бачаць выключна абарону правапарадку і бяспеку ўсіх людзей на стадыёне, а не нейкага аднаго асобна ўзятага чалавека, хай і вельмі паважанага.

Вось і выходзіць, што Папу Рымскага, Ангелу Мэркель і іншых сусветных палітыкаў берагуць не так педантычна, як Лукашэнку. Прычым, заўважце, у нас гэта робяць на грошы падаткаплатнікаў, і ахоўваюць, відавочна, ад іх жа!