Палітыка непрызнання

Расейскія экспэрты - пра перспектывы сустрэчы Пуціна і Трампа.

Апытаныя Расейскай службай «Голасу Амерыкі» экспэрты сышліся ў меркаванні, што Крэмль ні пры якіх абставінах не прызнае ўмяшанне сваіх спецслужбаў у амерыканскія выбары. Таксама яны ўпэўненыя, што саміт у Хельсінкі адбудзецца, нягледзячы на заклікі некаторых амерыканскіх палітыкаў скасаваць яго.

Кіраўнік фонду «Грамадская экспэртыза», у мінулым генеральны сакратар Саюза журналістаў Расеі Ігар Якавенка мяркуе, што ў абвінаваўчых высновах прыведзеныя неабвержныя факты. Разам з тым, з ягоных слоў, не існуе такіх довадаў або паказанняў сведак, якія прымусілі б Крэмль прызнаць учыненне кожнага злачынства, у тым ліку і гэтага.

«Насуперак тысячам сведчанняў Масква дагэтуль не прызнае ўдзелу Расеі ў вайне супраць Украіны, - Ужо і магілы загінулых там дэсантнікаў ніхто не ўтойвае, ды іх і схаваць немагчыма. Усё адно: «настамнет». Гэта ўпартая хлусня, адмаўленне відавочнага сталі неад'емнай часткай палітыкі, постпраўдай пуцінскага рэжыму».

Сорам не дым, вочы не выесць - вось пазіцыя, на якой стаіць Крэмль, і ён з яе не сыдзе датуль, пакуль не пацерпіць вельмі сур'ёзнай вайскова-палітычнай паразы, сцвярджае журналіст. На ягоны погляд, усякія перамовы з Пуціным бессэнсоўныя са змястоўнага пункту гледжання.

Аднак, Ігар Якавенка мяркуе, што нягледзячы на новыя абставіны расследавання расейскага ўмяшання ў выбары ЗША саміт у Хельсінкі адбудзецца: «Трамп не скасуе сустрэчу, бо не ў ягоных традыцыях паддавацца ціску і прыслухоўвацца да фальшывых-ньюс, як ён называе амерыканскія, і не толькі, СМІ. Гэта добра для Трампа і добра для Пуціна. А для ўсіх астатніх жыхароў Зямлі гэта альбо ніяк, альбо дрэнна».

Трампу важна хаця б фармальна выканаць сваё перадвыбарнае абяцанне - паспрабаваць «наладзіць стасункі» з Расеяй, заўважыў журналіст: «Увогуле, гэта шмат у чым іміджавая сустрэча. Пуціну важна паказаць, што ён такі самы магутны і вялікі лідар, як Кім Чэн Ын, з якім сустракаўся амерыканскі прэзідэнт. Трамп потым будзе казаць, што ён стрымаў сваё слова. Так што іх задачы зразумелыя».

У той жа час, як уяўляецца Ігару Якавенку, заклікі да Трампа дзейнічаць на саміце з пазіцыі сілы, хутчэй, палітычны лозунг, а не рэальная прапанова: «Для таго, каб праводзіць перамовы з пазіцыі сілы, трэба гэтую сілу ў дачыненні да Пуціна мець. На сёння агульная палітычная воля ўжыць сілу ў дачыненні да Пуціна адсутнічае. Захад у стане без адзінага стрэлу знішчыць пуцінскі рэжым, проста сцерці яго з твару зямлі эканамічна. Але няма на гэта палітычнай волі».

Экс-дэпутат Дзярждумы, генерал-маёр КДБ Аляксей Кандаураў таксама ўпэўнены, што Крэмль не прызнае факт умяшання ў амерыканскія выбары ніколі і ні пры якіх абставінах, нягледзячы на ўсе довады. На ягоную думку, гэта адзіны выхад для расейскіх уладаў і Уладзіміра Пуціна, інакш яны выставяць сябе запіснымі хлусамі, дакладней распішуцца пад гэтым уласнаручна.

«І пакуль гэтая тактыка спрацоўвае, - дадаў ён. - Яны адмаўляюць сваё дачыненне да катастрофы з (малайзійскім) «Боінгам», адмаўляюць расейскае ваеннае ўмяшанне на Данбасе. А што Захад? Так, уводзяць санкцыі, ды крытыкуюць. Але потым усё вяртаецца назад».

Кандаураў згодны з тым, што Трамп саміт не скасуе: «Ён у ім зацікаўлены не менш, чым Пуцін - у піяраўскіх і іншых мэтах. Напэўна, Трамп не выпадкова намагае і на сустрэчы адзін на адзін. Па-мойму, была б у яго магчымасць пагутарыць на ангельскай, ён бы і ад перакладчыкаў адмовіўся».

Адстаўны генерал КДБ таксама сумняваецца, што Трамп зможа правесці перамовы з Пуціным з пазіцыі сілы: «І потым гэта не мае асаблівага значэння. Вось ён з Кім Чэн Ынам сустракаўся як бы з пазіцыі сілы. І што - падпісалі малазначную паперу і ўсё. Трамп размахвае кулакамі, а ўсе разумеюць, што гэта пустое. І Пуцін гэта таксама разумее. Размахваць трэба тады, калі гатовы ўдарыць».

Разам з тым, Аляксей Кандаураў мяркуе, што напраўду ў амерыканскага выведзгуртавання інфармацыі, уключна з агентурнай, яшчэ больш, але яны не могуць яе цяпер агучыць з асцярогі «засвяціць» свае крыніцы. Таму ён не выключыў, што ЗША праз новыя абставіны могуць пайсці на санкцыі яшчэ больш жорсткія, чым тыя, якія ўводзіліся раней.

«Аднак у Крамлі, думаю, унутрана да гэтага гатовыя. Да таго ж іх асабіста гэта асабліва не закране. А еўрапейцы наўрад ці падтрымаюць новыя санкцыі», - сказаў на заканчэнне ён.