Трамп: У мяне няма завышаных чаканняў ад сустрэчы з Пуціным

Сустрэча прэзідэнтаў ЗША і РФ адбудзецца 16 ліпеня ў Хельсінкі.

Прэзідэнт ЗША Дональд Трамп заявіў, што не чакае шмат чаго ад саміту з прэзідэнтам Расеі Уладзімірам Пуціным, які пройдзе ў панядзелак у Хельсінкі.

Пра гэта паведамляе «Голас Амерыкі».

Чытайце: Акцыі прыхільнікаў і праціўнікаў саміту Расея-ЗША пачаліся ў Хельсінкі

«Я адпраўляюся туды з невысокімі чаканнямі, - заявіў амерыканскі лідар у інтэрв'ю тэлекампаніі CBS, якое выйшла ў эфір у нядзелю. - У мяне няма вялікіх чаканняў».

Трамп адмовіўся распавесці пра тое, якіх мэтаў ён хоча дасягнуць на першым саміце з Пуціным, але абяцаў, што «нічога дрэннага» ад гэтай сустрэчы не будзе. Раней прэзідэнты ЗША і Расеі сустракаліся на палях міжнародных мерапрыемстваў.

«Думаю, што сустракацца - гэта добра, - сказаў Трамп. - Я веру ў сустрэчы. Я веру, што сустрэча са старшынём Кімам (паўночнакарэйскім дыктатарам Кім Чэн Ынам. - Рэд.) была добрай справай. Думаю, што сустрэчы са старшынём КНР [Сі Цзіньпінам] былі вельмі добрай справай. Я мяркую, што гэта вельмі добра. Сустрэчы з Расеяй, Кітаем, Паўночнай Карэяй - я ў іх веру. Нічога дрэннага ад гэтага не будзе, а, магчыма, будзе нешта добрае».

Саміт Трампа з Пуціным адбудзецца праз тры дні пасля таго, як спецпракурор Роберт Мюлер высунуў абвінавачванні супраць 12 афіцэраў расейскай разведкі, абвінаваціўшы іх ва ўмяшанні ў прэзідэнцкія выбары ў ЗША ў 2016 годзе з мэтай дапамагчы Трампу ў барацьбе за Белы дом.

У Расеі няма дамовы аб экстрадыцыі з ЗША, таму малаверагодна, што Масква выдасць падазраваных ЗША для судовага пераследу.

Вядоўца CBS Джэф Глорыя спытаў Трампа, ці плануе ён прасіць Пуціна развязаць іх экстрадыцыю.

«Я не думаў пра гэта, - адказаў Трамп. - Можа быць. Але, зразумела, я буду пытацца ў яго пра гэта. Але зноў-такі, гэта было ў часы адміністрацыі Абамы. Што б яны ні рабілі, гэта было пры адміністрацыі Абамы».

Трамп неаднаразова асуджаў расследаванне, якім кіруе Мюлер, як «паляванне на ведзьмаў» і адмаўляў, што яго перадвыбарчы штаб ўступаў у змову з прадстаўнікамі Расеі. Раней ён ужо пытаўся Пуціна пра расейскае ўмяшанне на выбарах, а затым у Твітэры паўтараў пазіцыю Пуціна, што яны адмаўляюць умяшанне. У апошніх абвінаваўчых дакументах Мюлера не выстаўляецца ніякіх абвінавачванняў амерыканцам. Нягледзячы на гэта, яго 14-месячнае расследаванне працягваецца.

Замест таго, каб асудзіць Расею за хакерскія атакі на серверы, звязаныя з Дэмакратычнай партыяй ЗША, рэспубліканец Трамп усклаў адказнасць на сваіх палітычных апанентаў, Нацыянальны камітэт Дэмакратычнай партыі (НКДП), за непрыняцце адэкватных мер у абароне сваіх кампутарных сістэм у параўнанні з Нацыянальным камітэтам Рэспубліканскай партыі.

«Я чуў, што яны таксама спрабавалі ўзламаць Нацыянальны камітэт рэспубліканскай партыі, - сказаў Трамп. - Але ў нас была значна больш эфектыўная абарона. Мне казалі пра гэта некалькі чалавек. У нас была больш эфектыўная абарона, таму яны не змаглі [узламаць]. думаю, што НКДП павінна быць сорамна за тое, што яны дазволілі сябе ўзламаць. Але я чуў, што яны спрабавалі ўзламаць і рэспубліканцаў. Можа быць гэта не так, але ў іх была больш моцная абарона».

У суботу Трамп напісаў у Твітэры: «Гэтыя рускія займаліся сваімі справамі ў гады Абамы. Чаму Абама нічога не зрабіў з гэтай нагоды? Таму што ён меркаўваў, што пераможа махлярка Хілары Клінтан, вось чаму. Гэта ніяк не звязана з адміністрацыяй Трампа, але фэйкавыя навіны, як звычайна, не хочуць паведамляць праўду».