Злучаныя Штаты выставілі новае абвінавачанне супраць падазраванай у шпіянажы расейкі

Вялікае журы прыняло да ведама новыя факты з дзейнасці Марыі Буцінай.

Да абвінавачвання ў змове з мэтай працаваць замежным агентам, якое 16 ліпеня было выстаўленае супраць арыштаванай у ЗША грамадзянкі Расеі Марыі Буцінай, дадалося яшчэ адно, паведамляе выданне Politico.

Пракурор акругі Калумбія Джэсі Ліў падпісаў абвінаваўчае заключэнне, у якім гаворыцца, што яна не толькі ўдзельнічала ў змове з мэтай працаваць замежным агентам, але і рэальна дзейнічала ў якасці замежнага агента як мінімум з 2015 года.

Пракурорам удалося пераканаць вялікае журы прысяжных, якія зацвердзілі новае абвінавачванне супраць расейкі. Максімальнае пакаранне паводле гэтага абвінавачання прадугледжвае зняволенне ў турму на тэрмін да 10 гадоў. Першае абвінавачванне аб змове прадугледжвала пяцігадовы тэрмін зняволення.

Адвакат Буцінай Роберт Дрыскола напярэдадні выступіў з заявай, у якой аспрэчваў першапачатковае абвінавачанне, і заявіў, што ягоная кліентка, нядаўняя выпускніца каледжа, не «імкнулася паўплываць або падарваць якую-небудзь пэўную палітыку ці закон Злучаных Штатаў, яна імкнулася садзейнічаць паляпшэнню стасункаў паміж дзвюма краінамі».

У дакументах суда ўказана, што Буціна дзейнічала пад кіраўніцтвам высокапастаўленага расейскага чыноўніка і спрабавала ладзіць сустрэчы з «жыхарамі ЗША, якія маюць уплыў на амерыканскую палітыку, уключна з арганізацыямі, прасоўваць правы на валоданне зброяй, <...> з мэтай прасоўвання інтарэсаў Расейскай Федэрацыі».

У абвінавачванні не названы ні расейскі чыноўнік, ні арганізацыя, якая бароніць права на валоданне зброяй. Аднак выданне ўдакладняе, што гаворка ідзе пра экс-сенатара Аляксандра Торшына. Буціна працавала раней ягонай памочніцай, паведамляў Reuters. Яна і Торшын з'яўляюцца чальцамі Нацыянальнай стралковай асацыяцыі ЗША. З 2016 года Буціна пражывае ў ЗША паводле студэнцкай візы.

Politico называе Торшына «памочнікам прэзідэнта Расеі Уладзіміра Пуціна» і даўнім прыхільнікам Нацыянальнай стралковай асацыяцыі, які мае сувязі «як з расейскімі спецслужбамі, так і з прадстаўнікамі арганізаванай злачыннасці».

У расследаванні дзейнасці Буцінай брала ўдзел ФБР, якое атрымала доступ да яе перапіскі і зместу яе тэлефона. У высновах спецагента ФБР Кевіна Хельсана, прыкладзеных да абвінавачвання ў дачыненні да Буцінай, ёй прыпісанае дапамаганне ў стварэнні тайнага канала сувязі паміж элітамі Рэспубліканскай партыі і расейскім кіраўніцтвам. Нібыта ў перыяд навучання ў адным з універсітэтаў Вашынгтона з 2015 да 2017 года Буціна дзейнічала ў якасці крамлёўскага агента ўплыву. Выяўляецца, што яна атрымлівала інструкцыі ад высокапастаўленага расейскага чыноўніка, імя якога не паведамляецца.