Няўзораў: Трамп не разумеў, што дзяржавы Расея не існуе

Размова з Пуціным – гэта гутарка з царом Гіпербарэі.

У час сустрэчы з прэзідэнтам Расеі Уладзімірам Пуціным прэзідэнт ЗША Дональд Трамп памылкова меркаваў, што гутарыць з кіраўніком дзяржавы, зацікаўленай ва ўласным дабрабыце. Такое меркаванне выказаў у эфіры радыёстанцыі "Эхо Москвы" расейскі публіцыст Аляксандр Няўзораў.

"Кожны, хто ўступае ў міжнародную размову з Расеяй, абапіраецца на свой уласны, нейкі практычны, разумны, рацыянальны досвед. Яму здаецца, што ён размаўляе з прадстаўніком краіны, якая зацікаўленая ва ўласным дабрабыце, бяспецы, спакоі.

Ён не разумее, што ён размаўляе з ілюзіяй, з хімерай, з чараўніком, што такой дзяржавы не існуе, таму што гэтая размова з Пуціным – гэта як гутарка з царом Гіпербарэі. Памятаеце, у Герадота Гіпербарэя, дзе велізарныя мурашы здабываюць золата, дзе маленькія крыштальныя карлікі плююцца распаленым калам у нябёсах. Але гэта ў параўнанні з Расеяй яшчэ цалкам, я б сказаў, рэалістычная карціна", – апавёў ён.

На думку публіцыста, суразмоўца Пуціна не разумеў, з кім гутарыць. "Ён перакананы, што ён сапраўды гутарыць з кіраўніком іншай дзяржавы. А гэта як калі б паведамілі, што... Трамп сустрэўся з Саўронам. Гэта прыкладна паводле сэнсу і напалу абсурду аднолькава. Прытым, што мы бачым, што Уладзімір Уладзіміравіч бліскуча зрабіў беднага Трампа, але ён бы зрабіў любога і зробіць любога", – заявіў Няўзораў.

Ён дадаў, што размову Трампа з Пуціным нельга параўноўваць з ягонай сустрэчай з кіраўніком КНДР Кім Чэн Ынам.

"Кім Чэн Ын, тым не менш, прадстаўнік нейкі рэальны, у адрозненне ад Расеі, якая абсалютна Гіпербарэя. Гэта краіна, дзе няма логікі, прычынна-сэнсавых сувязяў, прычынна-выніковых сувязяў, дзе няма навукі, дзе няма развіцця, дзе няма нічога, дзе ёсць толькі міф і незразумела куды накіраванасць. Усё ж такі Расея значна больш міфалагічная і дзікая краіна, чым Паўночная Карэя. Паўночная Карэя – гэта, прынамсі, нейкае рацыянальнае, структураванае, зразумелае прымітыўнае зло.

А Расея – гэта нешта зусім іншае... Увогуле, ва Уладзіміра Уладзіміравіча ёсць дзіўны дарунак. У ягонай прысутнасці ўсе сябе адчуваюць ідыётамі", – прадоўжыў Няўзораў.

На ягоную думку, ніякіх вынікаў сустрэча Трампа з Пуціным не прынясе.

"Гэта пытанне нейкага асабістага досведу і пытанне магчымасці прадэманстраваць крутасць. Мы ж ведаем, што яшчэ гэта і патрабавалася як вялікае шоу – выцерці ногі аб Трампа – для таго каб адысці ад пытання пра пенсіі хоць бы на нейкі час", – падкрэсліў публіцыст.