На гандаль выставілі чарговую партыю канфіскаваных пад Менскам участкаў

Цэны стартуюць ад 18 тысяч рублёў.

На аўкцыён выставілі пяць лотаў у прыгарадзе Менска, канфіскаваныя ва ўладальнікаў, якія не ўклаліся ў тэрміны будаўніцтва дамоў і іх кансервацыю. З камунікацый - у асноўным толькі электрычнасць, і то не факт, што на самім участку. Цэны стартуюць ад 18 тысяч рублёў, паведамляе tut.by.

Гэтым летам ужо не першы раз прадаюць з аўкцыёну канфіскаваныя ўчасткі. На гэты раз прапануюць пяць лотаў. Бліжэй за ўсё да Менска размешчаныя два ўчастка ў Прылуцкай Слабадзе - лоты пад нумарамі 4 і 5. Плошча участкаў - 15 і 16 сотак. З камунікацый ёсць электрычнасць. Праўда, з пазнакай: «у раздзеле «інжынерная інфраструктура» ўказаныя камунікацыі, якія маюцца ў гэтым населеным пункце». Значыць, святло на ўчастак яшчэ трэба будзе падвесці. Стартавы кошт участкаў - 52 і 54 тысячы рублёў.

Адзін ўчастак (лот №1) з незавершаным будаўніцтвам, незакансерваваным капітальным будынкам прадаецца ў вёсцы Караліна (Крупіцкі сельсавет). Плошча ўчастка - амаль 15 сотак. З камунікацый у вёсцы ёсць электрычнасць і газ. Гатоўнасць жылога дома ацэненая ў 7%. Стартавы кошт - 18 тысяч рублёў.

Яшчэ два ўчасткі, лоты №2 і 3, прапануюць у вёсцы Беліца (Самахвалавіцкі сельсавет). Плошча участкаў - 13 і 15 сотак, стартавы кошт - 23 і 24 тысячы рублёў адпаведна.

Пачатак аўкцыёну намечаны на 31 жніўня, дакументы трэба падаць не пазней за 27 жніўня. Таргі пройдуць па адрасе: Менск, вуліца Чкалава, 5.