«Інвестары бачаць, што ў Беларусі ўводзіцца драконаўская сістэма»
6- 18.09.2018, 10:20
- 12,462
Наступ уладаў на свабоду слова павернецца эканамічнымі праблемамі.
Карыстальнікі беларускага Інтэрнэту больш не будуць ананімнымі. Як паведамляе журналіст «Белсата» Аляксандр Папко, даць свой нумар тэлефона - менавіта гэта неўзабаве павінен будзе зрабіць кожны, хто хоча пракаментаваць навіну на беларускім сайце. Аўтарызацыя каментатараў праз нумар тэлефона і магчымасць перадачы персанальных звестак спецслужбам - такія новаўвядзенні падрыхтавалі для карыстальнікаў беларускіх сайтаў аўтары паправак да Закону аб СМІ. Папраўкі ў закон увойдуць у дзеянне ўжо ў снежні.
А вось рабіць гэта праз перадачу рэдакцыі сайта нумара свайго тэлефона патрабуе праект пастановы Міністэрства інфармацыі, які неўзабаве зацвердзяць. Ліквідацыю ананімнасці ў беларускім сегменце інтэрнэту сілавыя міністэрствы вітаюць.
Звычайныя ж грамадзяне ставяцца да перспектывы пакідаць свае звесткі з меншым энтузіязмам.
Не ў захапленні ад новаўвядзення і рэдакцыі СМІ, якія павінны будуць захоўваць звесткі карыстальнікаў і «пры неабходнасці» перадаваць іх сілавікам.
Патрабаванне рэгістравацца на форумах з дапамогай тэлефоннага нумара - не адзінае абмежаванне свабод у інтэрнэце, якое прадугледжваюць папраўкі ў Закон аб СМІ:
патрабаванне рэгістрацыі інтэрнэт-СМІ
магчымасць блакавання сацыяльных сетак
ідэнтыфікацыя карыстальнікаў форумаў
перадача персанальных звестак спэцслужбам
Яны не толькі нанясуць фінансавую шкоду беларускім сайтам і прывядуць да адтоку беларускай аўдыторыі ў Рунэт. Яны пашкодзяць іміджу Беларусі як ІТ-краіне.
Аляксандр Класкоўскі, палітычны аглядальнік:
«Інвестары ж адсочваюць сітуацыю. Яны бачаць, што ўводзіцца драконаўская сістэма, якой няма ні ў адной еўрапейскай краіне. Дык як ісці сюды і ўкладваць грошы ў нейкія высокія тэхналогіі?»
На думку экспэрта, перамога над інтэрнэт-аўдыторыяй можа праявіцца піравай. Хвалі крытыкі яна не заглушыць, але нанясе краіне рэальныя фінансавыя страты. Нават замежнікі будуць ведаць, што галоўнымі спецыялістамі ад інтэрнэту ў Беларусі выступаюць не айцішнікі, а людзі ў пагонах.