Экспэрты прадказалі падзенне тэмпаў росту ВУП Кітая да мінімуму за 28 гадоў

Рост кітайскай эканомікі ў 2018 годзе - самы невялікі з 1990 года.

За 2018 год тэмпы эканамічнага росту ў Кітаі складуць 6,6%, што з'яўляецца самым нізкім паказчыкам з 1990 года. Да такой высновы прыйшлі апытаныя агенцтвам Reuters экспэрты і аналітыкі.

Афіцыйныя звесткі аб росце эканомікі ў 2018 годзе кітайскія ўлады павінны абвясціць у панядзелак, 21 студзеня. Некаторыя аналітыкі заявілі, што рэальны рост ВУП Кітая ўжо цяпер ніжэйшы за тыя лічбы, якія публікуюць ўлады, паведамляе РБК.

У 2017 годзе эканоміка Кітая, паводле афіцыйных звестак, вырасла на 6,8%.

«Большасць аналітыкаў думаюць, што, нягледзячы на захады стымулявання, эфект якіх выявіцца праз некаторы час, падзенне тэмпаў росту прадоўжыцца, перш чым пачнецца паляпшэнне. Сёлета чакаецца далейшае запаволенне да 6,3%», - піша Reuters.

Асноўнымі прычынамі зніжэння тэмпаў росту называюць слабы ўнутраны попыт, слабую інвестыцыйную актыўнасць і гандлёвую вайну з ЗША.

«Нават калі Кітай і Злучаныя Штаты дамовяцца пра гандлёвае пагадненне на гэтых перамовах, што само па сабе з'яўляецца цяжкай задачай, гэта не будзе панацэяй для паскарэння росту кітайскай эканомікі», - адзначаюць апытаныя агенцтвам экспэрты.

Нагодай для песімістычных прагнозаў сталі ў тым ліку звесткі аб росце ВУП за трэці квартал 2018 года. Ён стаў самым слабым з моманту фінансавага крызісу 2009 года, ВУП Кітая вырас на 6,5% у параўнанні з аналагічным паказчыкам мінулага года, у той час як у другім квартале рост склаў больш за 6,7%. Да публікацыі афіцыйных звестак аналітыкі чакалі, што эканоміка Кітая з ліпеня да верасня вырасце на 6,6%.

«Тэндэнцыя запаволення ўзмацняецца, нягледзячы на абяцанні кітайскіх уладаў заахвочваць унутраныя інвестыцыі для падтрымкі эканомікі. Унутраны попыт выявіўся слабым што да нечакана ўстойлівага экспарту», - сказаў тады ў размове з Reuters старэйшы эканаміст у развіваных рынках, такійскі SMBC Nikko Securities Ката Хіраяма.

Звесткі аб стане кітайскай эканомікі звычайна істотна ўплываюць на нафтавыя кошты. У верасні пасля дасягнення пікавых за апошнія чатыры гады значэнняў кошт нафты маркі Brent увайшоў у фазу падзення. Да канца снежня кошт барэля апусціўся з вераснёўскіх $82 да ўзроўняў, ніжэйшых за $50 за барэль. Цягам наступнай карэкцыі кошт барэля нафты Brent падняўся да $62 за барэль.