Сірыйскае войска пачало наступ на курдскія тэрыторыі
4- 13.10.2019, 20:34
- 18,592
Войскі Асада прасоўваюцца насустрач турэцкаму войску.
Сірыйскае ўрадавае войска пачало наступ у паўночнай частцы краіны, паведамляе дзяржаўнае агенцтва SANA са спасылкай на свайго карэспандэнта.
Сцвярджаецца, што «часткі рушылі на поўнач, каб супрацьстаяць турэцкай агрэсіі».
9 кастрычніка прэзідэнт Турцыі Раджэп Эрдаган абвясціў аб пачатку ваеннай аперацыі «Крыніца міру» на поўначы і паўночным усходзе Сірыі. Узброеныя сілы Турцыі супольна з «Сірыйскім нацыянальным войскам», якое падтрымоўваецца Анкарой, пачалі аперацыю супраць курдскіх фармаванняў і «Ісламскай дзяржавы». Першапачаткова турэцкія бамбавікі атакавалі пазіцыі курдаў, а затым турэцкае войска пачало наземны наступ.
Прэзідэнт ЗША Дональд Трамп назваў «дрэннай ідэяй» аперацыю Анкары. «Турцыя, чалец NATO, уварвалася ў Сірыю. Злучаныя Штаты не падтрымліваюць гэтую атаку», - заявіў Трамп. Перад пачаткам аперацыі кіраўнік Белага дома паведаміў, што знішчыць эканоміку Турцыі, калі тая зробіць непрадуманыя крокі, якія выходзяць, на ягоную думку, за рамкі.