Таксіст налічыў замежнікам 316 рублёў за паездку ад аэрапорта да цэнтра Менска

Відавочна, гэта рэкорд.

Калі маўчаць пра падобныя ганебныя гісторыі, нічога не зменіцца. Але мы спадзяёмся, перамены не за гарамі. А пакуль - яшчэ адзін прыклад усёдазволенасці, прагнасці і падману на фоне адсутнасці належнага рэгулявання ў сферы таксі. Дзейныя асобы новага эпізоду серыяла «Таксісты ў аэрапорце падманулі замежніка» - двое турыстаў з Сербіі, персанал гатэлю «Еўропа» і загадкавы кіроўца аўтамабіля таксі, запатрабаваўшы неверагодную суму за паездку, піша «Онлайнер».

Турысты з Сербіі ўчора цэлы дзень правялі ў Менску, да вечара вярнуліся ў гатэль «Еўропа» і пацікавіліся ў работніка рэцэпцыі, колькі будзе каштаваць таксі па горадзе. «Адразу было зразумела, што пытанне зададзенае нездарма, - кажа супрацоўнік гатэля Аляксей. - Высветлілася, яны баяліся, што за нядоўгую паездку па цэнтры з іх возьмуць не менш за 20 еўраў. Адкуль такія разлікі? Як высветлілася, учора ўначы за паездку ад аэрапорта да нашага гатэля яны заплацілі 140 еўраў».

Аляксей кажа, што высветліў у турыстаў падрабязнасці: «З іх слоў, яны выйшлі з аэрапорта на першым паверсе ў зоне прылётаў. Адгукнуліся на прапанову таксі ад мужчыны. Той набраў на тэлефоне паведамленне ў мэсэнджар, неўзабаве пад'ехала машына. Марку яны не запомнілі, але на камеры вонкавага назірання ў нашым гатэлі быў зафіксаваны седан Kia Rio серабрыстага колеру. Блізу 43 кіламетраў шляху - і яны ля ўваходу ў хол. Таксіст раздрукаваў чэк. Лічба на маёй памяці рэкордная - 316 рублёў. Вядома, госці краіны былі, мякка сказаць, ашаломленыя: чым заплаціць? Столькі беларускіх рублёў у іх не было. Таксіст не разгубіўся, пералічыў і запатрабаваў 140 еўраў. Турысты былі стомленыя пасля пералёту Бялград - Вена - Менск і не падумалі, што можна нешта зрабіць. У выніку аддалі грошы ў валюце, якую кіроўца не меў права прымаць».

«Калі б замежнікі зайшлі ў гатэль памяняць грошы (у нас усталяваны абменны аўтамат), магчыма, нам - супрацоўнікам гатэля - атрымалася б збіць цану, - сцвярджае суразмоўца. - Так здаралася ўжо не раз. Прыязджае наш госць, агучвае завоблачны кошт на таксі, мы выходзім і ўціхамірваем нахабных кіроўцаў. Папярэдні выпадак: мае калегі-дзяўчыны збілі цану таксіста з 170 рублёў. Яго сарамацілі і прыгразілі публікацыямі ў СМІ. У выніку ён узяў 70 рублёў і, не выдаўшы чэк, з'ехаў».

Хачу сказаць, яны напраўду баяцца агалоскі, ганьбы і грамадскага асуджэння. Відавочна, усведамляюць, якое непрыемнае першае ўражанне пакідаюць пра краіну сваімі дзеяннямі

Нагадаем, выстаўляць такія расцэнкі дае права пункт 169 пастановы Савета Міністраў Рэспублікі Беларусь «Аб некаторых пытаннях аўтаперавозак пасажыраў». Ён вызначае, што сума платы за паездку ўсталёўваецца аўтамабільным перавозчыкам, зыходзячы з яго выдаткаў, звязаных з выкананнем пасадкі і высадкі пасажыраў, кладкі і выгрузкі багажу і ручной паклажы. Гэта значыць перавозчык сам вырашае, колькі каштуе яго паслуга. Сума платы пры гэтым вызначаецца па таксометры, то бок таксіст у любым выпадку абавязаны падаць чэк па завяршэнні паездкі.