СМІ: Кат з «ПВК Вагнера» вучыць расейскіх дзяцей «патрыятызму»

Сталі вядомыя новыя падрабязнасці пра ўдзельнікаў паказальнага пакарання сірыйцаў.

Пецярбургскае выданне "Фонтанка" назвала імя другога ўдзельніка забойства і род заняткаў першага з апазнаных, Станіслава Д., паведамляе Настоящее Время.

Удзельніка забойства журналіста "Фантанкі" называюць Русланам з Бранска. На відэа мужчына, падобны на Руслана, рэзаў галаву забітага сірыйцу і здымаў, як іншы найміт спальвае падвешанае за ногі цела. Калі труп забітага загарэўся, ён усклікнуў на камеру: "Джамба!" і зрабіў рукой жэст, выпінаючы першы палец і мезенец, – гэта знак наймітаў з фільма "Тайныя салдаты Бенгазі".

Паводле інфармацыі "Фантанкі", Руслану 39 гадоў, ён былы вайсковец. У 19-гадовым узросце ўдзельнічаў у баявых дзеяннях у Чачні, атрымаў раненне, у 2001 годзе прызнаны ветэранам баявых дзеянняў. У Сірыю ў 2017 годзе паляцеў на борце сірыйскай авіякампаніі Cham Wings Airlines.

"Фонтанка" знайшла сяброў Руслана: яны апавялі, што ў Сірыю той лётаў толькі адзін раз, цяпер выхоўвае моладзь у духу патрыятызму. А сам Руслан прызнаўся журналістам, што працаваў валанцёрам у Дзіцячым доме юнай творчасці ў Бранску, але пра паездку ў Сірыю казаць адмовіўся.

Асобу Станіслава Д. выявіла "Новая газета". На фатаграфіі ля знявечанага цела ягоны твар відаць лепш за ўсё. На відэа Станіслаў сячэ сапёрнай лапаткай руку мёртваму сірыйцу і здымае адзін з эпізодаў расправы.

Да паездкі ў Сірыю, са жніўня 2012 года, Станіслаў Д. служыў у паліцыі Стаўрапольскага краю. З аддзела МУС "Георгіеўскі" яго звольнілі ў снежні 2013 года праз п'янства, але ён апратэставаў пастанову, а летам 2014 года былы паліцыянт перамог у судзе. На службе ў органах Станіслаў аднаўляцца не стаў.

На гэтым ягоныя сляды ў Расеі абрываюцца, але з'яўляюцца ва Украіне, на Данбасе. Гэты чалавек ёсць у базе СБУ сярод удзельнікаў вайны на Данбасе ў складзе "ПВК Вагнер" – нібыта ён быў стралком аўтаматычнага гранатамёта "Полымя", АГС-17.

НВ здолела высветліць, што з Сірыі Станіслаў вярнуўся жывым: ён некалькі разоў атрымліваў аўтамабільныя штрафы за перавышэнне хуткасці ў Белгародскай, Маскоўскай і Варонежскай абласцях. Гэтыя штрафы не аплачаныя, апошні выпісаны 7 лістапада гэтага года.

Яшчэ тры ўдзельнікі расправы да гэтага часу не апазнаныя.

На відэа, упершыню апублікаваным у 2019 годзе, падрабязна паказана, як жыхара Сірыі спярша забіваюць кувалдай да смерці, потым адразаюць галаву і рукі, а ў канцы абезгалоўленае цела падвешваюць на бэльцы разбуранага ангара і падпальваюць.

На фоне расправы грае песня "Я расейскі спецназ", у аднаго з удзельнікаў на рукаве ёсць шаўрон са словамі "Я табе зраблю вельмі, вельмі балюча". Удзельнікі забойства каментуюць тое, што адбываецца, і збіраюцца адправіць фатаграфіі свайму камандзіру. "Новая газета" называе гэтых людзей байцамі расейскай "прыватнай ваеннай кампаніі Вагнера", якая ў 2017 годзе вяла баі за газавае радовішча ў Сірыі, журналісты апазналі месца расправы.