Беларусы паведамляюць аб новых масавых выпадках анулявання tax free польскай мытняй

Што адбываецца?

Каб прывезці нешта з Польшчы, мала ўкласціся ў беларускія мытныя ліміты: трэба яшчэ, каб польская мытня не мела прэтэнзій, піша kp.by.

- Хто ў курсе, што з ватамі ў Дамачаве? Праз аднаго анулююць ваты, - такое паведамленне днямі з'явілася ў тэлеграм-канале, дзе людзі абмяркоўваюць сітуацыю на памежных пераходах каля Берасця.

Ватамі (VAT па-польску, то бок, ПДВ) у простамоўі называюць дакумент на вяртанне tax free. Каб аформіць ваты, у Польшчы дастаткова зрабіць закупы на суму ад 200 злотых - гэта крыху больш за 50 даляраў - у адным чэку. У краме да чэку прымацуюць дакумент (ён называецца faktura VAT), у якім указваецца пералік тавараў з коштамі брута і нета і сума, якую пакупнік зможа атрымаць назад. Зрабіць гэта можна падчас наступнай паездкі або ў Беларусі ў адным з банкаў. Максімальна можна вярнуць да 23% ад кошту пакупкі. Напрыклад, смартфон за 350 даляраў можа каштаваць у выніку прыблізна 270 даляраў.

Тыя, што часта ездзяць у Польшчу на закупы, ахвотна карыстаюцца вяртаннем ватаў. Не абавязкова набываць тэхніку: зэканоміць 23% можна нават на вопратцы і бытавой хіміі. Толькі для таго, каб вярнуць грошы, на мяжы трэба паставіць адзнаку аб тым, што тавар вывезены. Гэтым займаюцца польскія мытнікі: яны звяраюць пералік пакупак з тым, што пазначана ў дакументах і ставяць сваю пячатку. Але нечакана беларусы на гэтым этапе сутыкнуліся з праблемамі. Польскія мытнікі сталі ставіць штам аб ануляванні фактуры ватаў! У тлумачэнні да адмовы ёсць спасылкі на розныя законы Польшчы і Еўразвяза, але іх сутнасць зводзіцца да таго, што везці можна толькі тавары для асабістага карыстання.

- Калі цягам года паўтараюцца аднатыпныя пазіцыі тавару, то без варыянтаў - ануляцыя. А далей, сказалі, звяртайся да начальніка ў Тэрэспалі, потым у Бяла-Падлясцы, потым, пры жаданні, у суд, - дзеліцца досведам Раман.

Прэтэнзіі ў мытнікаў узнікалі, у асноўным, да тых, хто часта ездзіць на закупы.

- Мытнік сказаў, што глядзяць, каб на продаж не вазілі, - кажа Ганна.

Камусьці ўдалося нават сфатаграфаваць на стале ў польскага мытніка раздрукаваны ліст ад 20 лістапада з загалоўкамі: «Прававыя асновы для анулявання» і «Інструкцыя для вандроўцы». Там сказана, што ў вандроўцы ёсць права абскардзіць ануляванне - звярнуцца пісьмова да начальніка Любельскай мытна-падатковай інспекцыі ў Бяла-Падлясцы праз аддзел дарожнай мытні ў Тэрэспалі цягам 14 дзён.