Якую ялінку лепш купіць - штучную або сапраўдную?

Аргументы «за» і «супраць» падчас самага важнага выбару ў святочныя дні.

Многія людзі не ўяўляюць Новы год без ялінкі. Сапраўдная ці штучная - кожны вырашае сам, але ў абодвух выпадках важны якасны выбар, пішуць naviny.by.

Штучная, затое вечназялёная

Як бы гэта дзіўна не гучала, але пры выбары штучнай елкі або хвоі вельмі важныя тактыльныя адчуванні, як і пры выбары сапраўднай.

Штучную елку трэба патузаць за галінкі, паспрабаваць іх сагнуць, а яшчэ павадзіць рукой узад-наперад па іголках, сціснуць іх у кулаку.

Гэта робіцца для таго, каб вызначыць якасць «навагодняга вырабу». Калі нешта пайшло не так (напрыклад, іголкі абсыпаюцца, а галіны не ўсе выпрамляюцца), то перад вамі дрэнная прадукцыя.

Акрамя таго, елку трэба панюхаць: рэзкага хімічнага паху ні ў якім разе быць не павінна.

Затым вам трэба будзе азнаёміцца з пакаваннем вырабу.

Перш за ўсё, важная інфармацыя аб тым, ці ўжываліся ў вытворчасці шкодныя хімікаты і таксіны. Пераканайцеся таксама, што гэта не проста бяспечны, але яшчэ і гіпаалергенны матэрыял.

Важная ўласцівасць штучнай ялінкі - вогнетрываласць. Шукайце на ўпакоўцы (у інструкцыі) слова «антыпрэн». Калі яно ёсць, значыць, выраб надзейна абаронены ад агню.

Абыходзіце бокам «папяровыя» елкі, зробленыя з цэлюлозы. Выпадковая іскра ці нагрэтыя гірлянды могуць лёгка запаліць яе.

Наогул пільна вывучайце ўсе звесткі аб сертыфікацыі - яны павінны быць перакладзеныя на расейскую або беларускую мову.

Краіна-вытворца і імпарцёр таксама важныя, але яшчэ больш - адрасы і кантактныя тэлефоны саміх кампаній, каб у выпадку непрыемнасцяў можна было накіраваць ім скаргі.

Еўрапейскія вытворцы забяспечваюць свае вырабы поўнай дакументацыяй. Яны выпускаюць якасныя і бяспечныя ялінкі. У Беларусь штучныя елкі і хвоі вязуць, як правіла, з Польшчы. Тавар імпартуецца таксама з Ганконга, Тайваня, Тайланда і Кітая. Пытанні ўзнікаюць, перш за ўсё, да кітайскіх ялінак.

Робячы выбар на карысць штучнай елкі альбо хвоі, памятайце аб тым, што пры іх вырабе выкарыстоўваліся рэсурсы, якія не аднаўляюцца, у дадатак было выдаткавана шмат энэргіі, якая таксама ўтварае вугляродны след.

У дадатак, склад такіх «вырабаў» неаднастайны, праз чаго іх не перапрацоўваюць. А значыць, елка ці патрапіць на сметнік, ці будзе проста спаленая. У абодвух выпадках прыродзе будзе нанесеная непапраўная шкода.

Дарэчы, беларускія рамеснікі цяпер прапануюць арыгінальныя штучныя елкі і хвоі ручной работы. Такія «калядныя дрэвы» робяць у тым ліку з дрэва, прычым з выкарыстаннем толькі бясшкодных лакаў і фарбаў.

Гэтыя елкі выглядаюць вельмі свежа і незвычайна, а галоўнае, іх могуць вырабіць на вашу асабістую замову. Пры жаданні такую драўляную ёлку можна зрабіць самому.

Сапраўдная, затое недаўгавечная

Некаторыя людзі, якія вельмі любяць усё натуральнае, аддаюць перавагу сапраўднай елцы і хвоі, якія трэба самім здабываць, як у старадаўнія часы, а не купляць на ёлачных базарах або ў гадавальніках.

На перыяд навагодніх святаў у Беларусі з году ў год уводзіцца ўзмоцнены рэжым аховы лясоў. Гэта азначае, што лясы будуць старанна патруляваць, прычым не адны леснікі. А на спецыяльных пастах стануць правяраць наяўнасць дакументаў на правоз дрэў.

Грамадзяніну, які трапіцца з сякерай і «доказамі злачынства», пагражае штраф да 50 базавых велічынь (да 1275 рублёў). Фірме ці індывідуальнаму прадпрымальніку такое беззаконне абыдзецца даражэй у 4-6 разоў.

Зразумела, сам вулічны ялінкавы базар, дзе вы будзеце купляць сапраўдную елку ці хвою, павінен быць легальным.

Гэта лёгка даведацца, напрыклад, па тым, ці пакажуць вам на вашу просьбу дазвол на гандаль, а не толькі прыгожы прайс-ліст. І наогул, ці праб'юць чэк пасля пакупкі.

Многія выбіраюць жывую елку, а не сасну. Аднак тут ёсць свае плюсы і мінусы. У елкі ўстойлівы хвойны водар, але яна абсыпаецца хутчэй. Хвоя не так моцна пахне і ў дадатак вельмі смалістая, затое яе іголкі даўжэй застаюцца на галінах.

Спецыялісты раяць пры куплі і елі, і хвоі пастукаць ствалом аб зямлю, каб пераканацца, ці не абсыпаюцца іголкі. А яшчэ разламаць у руцэ хваінкі - ці стане адчувальны лясны, «зялёны» пах?

Акрамя таго, не лішнім будзе праверыць сам ствол дрэва (па ім не павінна ісці цёмная аблямоўка), ацаніць пышнасць і гнуткасць галінак.

Сапраўдныя елкі, хвоі і нават піхты зараз прадаюць у кадках або чыгунах - галоўнае, правільна выбраць і даглядаць за імі.

Спецыялісты раяць купляць такія дрэвы ў гадавальніках. Пры гэтым асаблівую ўвагу варта звярнуць на субстрат, у якім утрымліваецца расліна – ці не перасушаны ён.

Такое жывое дрэва з надыходам вясны можна паспрабаваць пасадзіць у сябе на лецішчы - гэта будзе другое свята для вас, калі яно прыжывецца.