СМІ: Гуцырыеў ім не патрэбны, патрэбны персанаж больш буйны – Лукашэнка

Адна з версій «наезду» на структуры «дзядзькі Мішы з Масквы».

«На гэтым тыдні актывізаваліся сілавікі: яны раптам зацікавіліся Міхаілам Гуцырыевым і ягоным бізнэсам, правялі ператрусы ў офісах, канфіскавалі дакументы – пра што “зрабілі справаздачу” шляхам зліву інфармацыі ў СМІ і Telegram-каналы. Прычым ФСБ і ягоныя структуры рапартавалі пра нейкую справу, не даўшы ніякай канкрэтыкі – толькі намёкі», – цытуе «Салідарнасць» тэлеграм-канал ЪЪ. – «Тым не менш хваля негатыву пайшла, і Гуцырыеву з ягонымі кампаніямі яна патрэбная наўрад ці.

Толькі вось і сам Гуцырыеў, падобна, сілавікам не патрэбны. Патрэбен ім персанаж больш буйны – Аляксандр Лукашэнка. Але паколькі на кіраўнікоў наўпрост ФСБ наязджаць пакуль баіцца, пастанавілі дзейнічаць праз старадаўняга сябра кіраўніка Беларусі, які даўно і паспяхова вядзе там справы. Нібыта далі сігнал «галоўнаму».

«Падобна, ФСБ задумала гульню ў палітыку – магчыма, употай спадзеючыся на таемнае ўхваленне Пуціна, які сімпатызуе гэтай установе. Але – наўрад ці: той занадта скрупулёзна ставіцца да сваёй працы, і ўмешвацца ў яе нікому не дазволіць», – прыводзіць беларускі СМІ яшчэ адну цытату.

Раней на тыдні з'явілася інфармацыя, што праводзяцца ператрусы ў структурах бізнэсоўца Міхаіла Гуцырыева і ягонага сына Саіда. Пра гэта напісалі «Камерсант», «Ведамасці» і шэраг іншых аўтарытэтных расейскіх СМІ.

Сам бізнэсмэн, які мае шырокі бізнэс у Беларусі, а таксама з'яўляецца сябрам Лукашэнкі, казаў пра правакацыі, заяўляючы, што ніякіх ператрусаў не праводзілася.