У Беларусі змянілася адміністрацыйна-тэрытарыяльнае ўладкаванне трох абласцей

Змены закранулі межы Берасцейскай, Гарадзенскай і Менскай абласцей.

Лукашэнка падпісаў Указ №104 "Аб адміністрацыйна-тэрытарыяльным уладкаванні Берасцейскай, Гарадзенскай і Менскай абласцей", паведамілі interfax.by ў прэс-службе дыктатара.

"Межы гэтых адміністрацыйна-тэрытарыяльных адзінак былі ўсталяваныя больш за 60 гадоў таму, у 1950-я гады, графічным спосабам на аснове картаграфічнага матэрыялу, які быў у той час. З цягам часу праз меліярацыйныя і іншыя работы, будаўніцтва аб'ектаў транспартнай інфраструктуры межы перасталі супадаць з цвёрдымі контурамі мясцовасці (рэкамі, меліярацыйнымі каналамі, дарожнай сеткай, ляснымі масівамі, прасекамі і іншымі)", - гаворыцца ў паведамленні.

Указ прадугледжвае ўсталяванне з 1 снежня 2019 года межы Берасцейскай, Гарадзенскай і Менскай абласцей, іх раёнаў і горада Жодзіна, ажыццяўленне рэгістрацыі і ўліку змен адміністрацыйна-тэрытарыяльнага ўладкавання абласцей, раёнаў, сельсаветаў у Адзіным рэестры адміністрацыйна-тэрытарыяльных і тэрытарыяльных адзінак Рэспублікі Беларусь. Межы Берасцейскай вобласці і яе раёнаў, якія супадаюць з Дзяржаўнай мяжой Рэспублікі Беларусь з Украінай, будуць зменены пасля завяршэння дэмаркацыі.

Адпаведныя змены ўнясуць у Адзіны дзяржаўны рэгістр нерухомай маёмасці, правоў на яе і ўгод з ёй і Рэестр адрасоў Рэспублікі Беларусь цэнтралізавана ў межах сродкаў рэспубліканскага бюджэту, якія прадугледжваюцца Дзяржкаммаёмасцю на маёмасныя адносіны, картаграфіі і геадэзіі.

За выдачу (афармленне) дакумента, якi сведчыць права на зямельны ўчастак, мыта спаганяцца не будзе. Да сумы платы за дзяржаўную рэгістрацыю зямельных участкаў, правоў, абмежаванняў (абцяжаранняў) правоў на іх і ўнясенне выпраўленняў у дакументы рэгістра нерухомасці, а таксама да тарыфаў на паслугі па падрыхтоўцы звестак для дзяржаўнай рэгістрацыі і ўнясення выпраўленняў усталююць паніжальныя каэфіцыенты.

Грамадзяне, індывідуальныя прадпрымальнікі і юрыдычныя асобы будуць вызваленыя ад платы за ўнясенне змяненняў у дакументы, якія змяшчаюць звесткі аб адрасе. Дзеянне дамоў арэнды зямельных участкаў, межы якіх змяняюцца, захоўваюцца да спынення тэрміну арэнды.