Магутны сігнал: Злучаныя Штаты Амерыкі расказалі аб перакідванні ў Еўропу ядзерных бамбавікоў B-52

Гэты крок успрымаецца як адказ Расеі.

Самалёты выконваюць навучальныя заданні ў розных раёнах кантынента і ўдзельнічаюць у сінхронных вучэннях з вайсковымі лётчыкамі ў Ціхаакіянскім рэгіёне

ВПС ЗША перакінулі ў Еўропу шэсць ядзерных бамбавікоў B-52 для вучэнняў «інтэграцыі ў тэатр ваенных дзеянняў і лётнай падрыхтоўкі» з рэгіянальнымі хаўруснікамі і партнёрамі з NАТО.

Гэты крок успрымаецца як магутны сігнал Расеі, якая ў гэтыя дні адзначае пяцігоддзе вайсковай анэксіі Крыма, паведамляе «Голас Амерыкі».

Аперацыйная авіяцыйная група, якая складаецца з бамбавікоў B-52 Stratofortress, лётчыкаў і дапаможнага абсталявання з 2-га бамбавальнага крыла, што базуецца на базе ВПС Барксдэйле ў Луізіяне, прыляцела на базу Каралеўскіх ВПС Фэрфорд у канцы мінулага тыдня і з тых часоў удзельнічае ў розных трэнінгавых заданнях ва ўсёй Еўропе, паведамілі ў ВПС ЗША.

У панядзелак чатыры B-52 «выканалі палёты ў некалькі месцаў у Еўропе, у тым ліку да Нарвежскага мора, Балтыйскага мора/Эстоніі і Міжземнага мора/Грэцыі», паведамілі ў ВПС.

Бамбавікі B-52 з базы ВПС Андэрсана на выспе Гуаме і з базы Фэрфорда таксама правялі «адначасовыя вучэнні для азнаямлення з тэатрамі ваенных дзеянняў у Індыйска-Ціхаакіянскім рэгіёне і Еўропе», калі бамбавікі «паляцелі на поўнач, да абшару, размешчанага на ўсход ад Камчацкай паўвыспы» блізу Расеі.

«Агулам палёты з Індыйска-Ціхаакіянскага рэгіёну і Еўропы прадэманстравалі прыхільнасць ЗША сваім хаўруснікам і партнёрам праз глабальнае разгортванне вайсковых сіл», - гаворыцца ў прэс-рэлізе ВПС.

Бамбавікі B-52 упершыню паступілі на ўзбраенне ў 1950-я гады, пасярод «халоднай вайны», і першапачаткова ствараліся як міжкантынентальныя ядзерныя бамбавікі з вялікай далёкасцю палёту, здольныя нанесці ўдар у глыбінных раёнах Савецкага Саюза.

Новая мадыфікацыя B-52 была ўведзеная ў эксплуатацыю ў 1962 годзе, і 48-мэтровы самалёт стаў сімвалам «халоднай вайны».

Пасля заканчэння «халоднай вайны» самалёты зведалі значныя змены і былі абсталяваныя высокадакладнымі ракетамі, сучаснай электронікай і высокатэхналагічнымі датчыкамі.

Паводле афіцыйнай інфармацыі ВПС, кожны бамбавік можа несці бомбы, міны і ракеты агульнай масай блізу 32 тон.

Масква працягвае нарошчванне ўласнай вайсковай прысутнасці ў рэгіёне, змушаючы ЗША рабіць тое ж самае.

Аднак кіраўнік Еўрапейскага камандавання ЗША кажа, што гэта, відаць, не прыносіць вынікаў.

«Я пакуль не задаволены нашым станам сродкаў стрымлівання ў Еўропе», - заявіў генерал Керціс Скапароці раней у гэтым месяцы.

Паводле ягоных слоў, ягонае камандаванне сутыкаецца з бракам наземных і вайскова-марскіх сіл, а таксама сродкаў вядзення выведкі, назірання і рэкагнаставання.

«Мяне турбуе патэнцыял для вядзення выведкі, назірання і рэкагнаставання, улічваючы рост пагрозы з боку Расеі. Мне трэба яго павялічыць», - дадаў ён.

«У святле мадэрнізаванай і ўсё больш агрэсіўнай канфігурацыі расейскіх сіл Еўрапейскае камандаванне рэкамендуе нарасціць нашы сілы, перададзеныя ў аперацыйнае падпарадкаванне, і сілы, якія знаходзяцца ў Еўропе на ратацыі, для ўзмацнення нашай пазіцыі стрымлівання», - сказаў Скапароці.