Кіраўніца Мурманскай вобласці РФ падала ў адстаўку

Расею ахапіў «губернатарапад».

Губернатарка Мурманскай вобласці РФ Марына Каўтун абвясціла аб адстаўцы. Пра гэта яна паведаміла падчас брыфінгу, піша РБК.

Яна заявіла журналістам, што папрасіла прэзідэнта РФ Уладзіміра Пуціна аб датэрміновым сыходзе са сваёй пасады і паказала, што не будзе ўдзельнічаць у новых губернатарскіх выбарах у 2019 годзе.

«Я без малога сем гадоў прапрацавала на пасадзе. Я не буду ўдзельнічаць у губернатарскіх выбарах, мяркую, што абнаўленне ў вышэйшых эшалонах улады патрэбнае. Я папрасіла прэзідэнта аб датэрміновай адстаўцы, каб той чалавек, які прыйдзе, паспеў пазнаёміцца з рэгіёнам», - сказала яна.

Каўтун адзначыла, што пастанова аб адстаўцы была для яе цяжкай, але, тым не менш, яна мяркуе, што так будзе лепш. «Я пакідаю пасаду губернатара з пачуццём задавальнення і нават гонару», - дадала яна.

Каўтун кіравала Мурманскай вобласцю з 2012 года. Яе паўнамоцтвы міналі ў 2019 годзе.

Пра тое, што Каўтун напісала заяву аб сыходзе са сваёй пасады, у мінулы аўторак, 19 сакавіка, пісаў РБК са спасылкай на крыніцу, блізкую да кіраўніцтва рэгіёну і да Крамля. Заяву аб адстаўцы, з іх звестак, губернатарка падрыхтавала 18 сакавіка. Магчымая прычына ейнага сыходу, распавядалі суразмоўцы РБК, - унутрыэлітныя канфлікты, якія сталі б перашкодай для яе перавыбрання.

Кандыдатуру Каўтун на пасаду губернатара прапанаваў Дзмітрый Мядзведзеў, які займаў тады пасаду прэзідэнта РФ. Пазней яе падтрымала Мурманская абласная дума. Са звестак крыніц РБК і «Каммерсанта», падтрымку Каўтун надаў экс-старшыня «Нарнікелю» Уладзімір Стржалкоўскі. У 2014 годзе Марына Каўтун датэрмінова склала паўнамоцтвы, пайшла на выбары і пераабралася на новы тэрмін.

Адстаўка кіраўніцы Мурманскай вобласці стала не адзінай на гэтым тыдні. У аўторак, 19 сакавіка, з уласнага жадання склаў паўнамоцтвы губернатар Чалябінскай вобласці Барыс Дуброўскі. Часова выконваць ягоныя абавязкі прызначылі першага намесніка міністра энергетыкі Аляксея Тэкслера.

На наступны дзень, 20 сакавіка, пакінуў сваю пасаду і кіраўнік рэспублікі Аляксандр Берднікаў, які ўзначальваў рэгіён 13 гадоў. На яго месца да верасьнёўскіх выбараў прыйшоў кіраўнік ГЛОНАСа Алег Харахордзін. Таксама змяніўся кіраўнік Калмыкіі: замест Аляксея Арлова, які кіраваў рэспублікай з 2010 года, Пуцін прызначыў дарадцу кіраўніка Расмоладзі Бату Хасікаву.