Чым пагражае Украіне забарона РФ на экспарт нафты для Беларусі

Украінскі паліўны рынак перажыве новае пагадненне Менска і Масквы ў пастаўках нафты.

Забарона Расеі для Беларусі экспартаваць нафту і нафтапрадукты не адаб'ецца на ўкраінскім паліўным рынку. Пра гэта Liga.net паведаміў дырэктар кансалтынгавай кампаніі А-95 Сяргей Куюн.

Паводле ягоных словаў, фактычна гэтая норма запрацавала яшчэ ўвосень, калі паміж краінамі быў падпісаны адпаведны пратакол, а цяпер расейская Дзярждума толькі фармалізавала яго.

"Карыстаючыся льготным рэжымам перамяшчэння ў рамках Мытнага саюза, Беларусь рээкспартавала расейскія нафтапрадукты, у сутнасці, забіраючы ў Масквы экспартную мыту. Ва Украіну значнымі былі толькі рээкспартным пастаўкі звадкаванага газу, але і іх спыненне рынак перажыў спакойна", – сказаў Куюн.

Цяпер беларусы пастаўляюць ва Украіну толькі нафтапрадукты ўласнай вытворчасці, кошты на якія моцна не змяніліся пасля забароны рээкспарту, дадаў дырэктар А-95.

Раней паведамлялася, што Дзярждума РФ ратыфікавала пратакол пра змены ў пагадненне з Беларуссю ў пастаўках нафты і нафтапрадуктаў.

Дакумент забараняе Беларусі экспартаваць нафту і нафтапрадукты, якія ёй паставіла Расея і вызначае працэдуры ўзгаднення індыкатыўных балансаў і пратаколаў.

Да падпісання пратакола РФ планавала цалкам спыніць бязмытныя пастаўкі нафтапрадуктаў у Беларусь, бо апошняя цалкам забяспечвае сябе ўласнымі нафтапрадуктамі за кошт перапрацоўкі нафты з РФ.

Цягам года Расея пастаўляе ў Беларусь 24 млн тонаў нафты, але фактычна Менск набывае толькі 18 млн тонаў, астатнія 6 млн тонаў "перамытніваюцца". Гэта значыць, у беларускі бюджэт пералічваюцца экспартныя мыты з гэтага аб'ёму.

Паводле звестак Белстата, за 2018 год Беларусь паставіла ва Украіну 3,16 млн тонаў нафтапрадуктаў, што на 11,9% менш чым у 2017-м.