Данкверт забараніў увозіць у РФ з Беларусі яблыкі пад выглядам турэцкіх

Рассельгаснагляд выказаў недавер сертыфікатам на «беларускія» яблыкі.

Рассельгаснагляд забараніў з 22 сакавіка увозіць у Расею «турэцкія» яблыкі праз Беларусь. Пра гэта гаворыцца ў паведамленні службы, якое паступіла ў РБК.

«У сувязі з высокімі рызыкамі ўвозу на тэрыторыю Расеі транзітам праз Беларусь санкцыйнай прадукцыі пад выглядам прадукцыі, вырабленай у Турцыі, Рассельгаснагляд прыняў пастанову з 22 сакавіка забараніць рээкспарт свежых яблыкаў паходжаннем Турэцкая Рэспубліка, з Рэспублікі Беларусь», - гаворыцца ў паведамленні.

У Рассельгаснаглядзе дадалі, што неаднаразова прасілі калег з Беларусі пацвярджаць краіну паходжання прадукцыі, якія адпраўляюцца на рээкспарт у Расею. У службе дадалі, што нягледзячы на гэта з Беларусі працягвае паступаць прадукцыя з няпэўнымі звесткамі ў сертыфікатах.

Напрыклад, у сакавіку 2019 года ў Расею паступілі яблыкі, якія па дакументах былі вырашчаны ў Турцыі. Але ў Рассельгаснаглядзе заўважылі нелагічнасць лагістыкі іх перамяшчэння. Замест таго, каб наўпрост паступіць з Турцыі ў порт Наварасейска, яблыкі спачатку адправіліся ў Латвію, а потым ужо ў Беларусь і Расею.

«Абраная лагістыка выклікае ў Рассельгаснагляду сумнеў у легальнасці такіх паставак і недавер да звестак, названых у беларускіх рээкспартных сертыфікатах», - заявілі ў службе.

Раней Рассельгаснагляд прыстрашыў забараніць увоз расліннай прадукцыі, якая паступае з Беларусі і іншых краін ЕўрАзЭС. Служба разглядае пытанне пра пераход на прамыя пастаўкі праз шматлікія выпадкі паступлення ў Расею санкцыйных тавараў праз Беларусь.

У лютым 2018 года Рассельгаснагляд забараніў пастаўкі яблыкаў з 31 беларускага прадпрыемства, каб не дапусціць увоз у Расею санкцыйнай прадукцыі.

Расея ўвяла прадуктовае эмбарга ў жніўні 2014 года. Пад забаронай аказаліся пастаўкі свініны, ялавічыны, мяса птушкі, рыбы, малака, сыроў, а таксама садавіны і агародніны з большасці краін Заходняй Еўропы. Экс-міністр сельскай гаспадаркі РФ Аляксандр Ткачоў заяўляў, што пасля гэтага Беларусь стала перавалачнай базай для паставак санкцыйнай прадукцыі. З ягоных слоў, у Расею пастаўляліся якія трапілі пад забарону тавары з Польшчы, Галандыі, Францыі, Бэльгіі і інш.

У лістападзе 2018 года Камітэт дзяржкантролю (КДК) Беларусі спыніў пастаўкі санкцыйнай прадукцыі ў Расею, гэтым бізнэсам валодала група расейскіх і ўкраінскіх грамадзян.