Рада Еўропы вярнула Расеі права голасу ў ПАРЕ
12- 17.05.2019, 16:15
- 15,271
Расеі будзе дадзеная магчымасць прызначыць дэлегацыю для ўдзелу ў пленарным пасяджэнні.
Рада Еўропы вярнула Расеі права голасу ў Парламенцкай асамблеі (ПАРЕ), якога Масква была пазбаўленая за незаконную анэксію Крыма ў 2014 годзе. Гэта вынікае з заявы, прынятай кіраўнікамі МЗС 47 краін-чальцоў РЕ на пасяджэнні Камітэта міністраў Рады Еўропы ў Хельсінкі ў пятніцу, 17 траўня. У дакуменце, прынятым пераважнай большасцю галасоў, гаворыцца, што ўсе краіны-чальцы РЕ павінны мець права ўдзельнічаць у рабоце Рады Еўропы і ПАРЕ на раўнапраўнай аснове, паведамляе «Нямецкая хваля».
Паводле паведамленняў, Расеі будзе дадзеная магчымасць у тэрміновым парадку прызначыць дэлегацыю для ўдзелу ў пленарным пасяджэнні ПАРЕ ў канцы чэрвеня. На гэтым пасяджэнні будуць прымацца вельмі важныя пастановы: будзе абраны новы генеральны сакратар Рады Еўропы, а таксама некалькі суддзяў Еўрапейскага суда ў правах чалавека (ЕСПЧ).
Foreign Minister @HeikoMaas: "It is good news that we agreed that Russia should remain in the Parliamentary Assembly of the Council of Europe. Especially because this preserves the right of Millions of Russians to appeal to the European Court of Human Rights. " @coe pic.twitter.com/tv3YqgcJjf
— GermanForeignOffice (@GermanyDiplo) 17 мая 2019 г.
Кіраўнік МЗС ФРГ Хайка Маас (Heiko Maas) у каментары прынятай у Хельсінкі пастановы, напісаў у сваім мікраблогу ў Twitter: «Добра, што мы дамовіліся аб тым, што Расея застанецца ў Парламенцкай асамблеі і ў Радзе Еўропы, асабліва таму, што гэта захоўвае за мільёнамі расейцаў права звяртацца ў Еўрапейскі суд у правах чалавека».
Са свайго боку кіраўнік МЗС Расеі Сяргей Лаўроў запэўніў, што Расея не пакіне Раду Еўропы. Мы не адмаўляемся ад нашых абавязацельстваў, у тым ліку фінансавых, сказаў ён, дадаўшы, што Расея зацікаўленая ў тым, каб прадаўжаць працу ў Радзе Еўропы на аснове нормаў міжнароднага права і прынцыпаў, замацаваных у Статуце ААН.
Пасля пазбаўлення Расеі права голасу ў ПАРЕ, Масква адмовілася ўдзельнічаць у працы асамблеі, а з лета 2017 года спыніла плаціць і сяброўскія ўнёскі.
Кіраўнік МЗС Украіны Павел Клімкін не прыехаў на канферэнцыю Камітэта міністраў РЕ ў Хельсінкі. Ён папярэджваў, што дзяржавы, якія выступаюць у падтрымку вяртання Расеі ў ПАРЕ, нясуць, з ягоных слоў, долю адказнасці за зрыў менскіх пагадненняў аб урэгуляванні становішча на ўсходзе Украіны. Клімкін настойліва заклікаў адмовіцца ад нармалізацыі стасункаў з Расеяй.