Акумулятарны завод пад Берасцем пачаў нелегальную працу па начах?

Некалькі начэй запар у траўні на заводзе гарэла святло і быў чутны шум абсталявання, якое працуе.

У другой палове красавіка на акумулятарным заводзе пад Берасцем працавала камісія ў прыёмцы, але 30 красавіка акт на запуск вытворчасці так і не падпісалі, паведамляе «Белсат».

Некалькі начэй запар у траўні на заводзе гарэла святло і быў чутны шум працуючага абсталявання. Познім вечарам 2 траўня прадстаўнікі ініцыятыўнай групы выявілі шум на ўчастку свінцовай стужкі. Прыкладна праз 40 хвілін, калі да заводу з’ехаліся людзі, гул спыніўся.

– Начны рэйд па выяўленні несанкцыянаванага запуску заводу прынёс свой плён. Кіраўнік прыродаахоўнай інспекцыі гораду і раёну ўжо сёння на абʼекце. Улады сказалі, што актывісты пераблыталі дадзены шум з ровам матораў самалёта або з машынай для мыцця падлогі, – напісалі праціўнікі запуску акумулятарнага заводу ў сацыяльных сетках.

Нагадаем, што акумулятарны завод не змог атрымаць дазвол на працу ўжо другі раз – у лютым камісія па прыёмцы прадпрыемства таксама не падпісала акт на яго афіцыйны запуск. Але, не гледзячы на гэта, у красавіку завод выпусціў першую партыю прадукцыі.

Кампанія «iPower» распачала будаўніцтва акумулятарнага заводу напрыканцы 2017 года. Падрадчыкам выступае кітайская карпарацыя. Афіцыйная экалагічная экспертыза сцвярджае, што ўздзеянне прадпрыемства на навакольны асяродак будзе нязначнае, але мясцовыя жыхары выступаюць супраць праекту. Берасцейцы сабралі больш за 37 тысяч подпісаў супраць будаўніцтва заводу і накіравалі іх у Адміністрацыю прэзідэнта. Кожную нядзелю жыхары Берасця выходзяць на акцыі пратэсту ў цэнтры гораду.