У ЗША правялі першыя выпрабаванні гіпергукавых баявых блокаў

ВПС ЗША паспяхова правялі першыя лётныя выпрабаванні AGM-183A.

У выпрабаваннях удзельнічала версія прататыпу ARRW, на якой знаходзіліся толькі сэнсарныя датчыкі

Вайскова-паветраныя сілы ЗША правялі паспяховыя лётныя выпрабаванні гіпергукавых баявых блокаў з сістэмай паветранага запуску ARRW (Air-Launched Rapid Response Weapon), носьбітамі якіх сталі стратэгічныя бамбавікі B-52 Stratofortress.

Пра гэта паведамляе rbc.ua са спасылкай на прэс-службу ВПС ЗША.

«Вайскова-паветраныя сілы ЗША паспяхова правялі першыя лётныя выпрабаванні AGM-183A - сваіх гіпергукавых баявых блокаў з сістэмай паветранага запуску ARRW на бамбавіках B-52 Stratofortress на авіябазе Эдвардс (штат Каліфорнія)», - гаворыцца ў паведамленні.

У выпрабаваннях удзельнічала версія прататыпа ARRW, на якой знаходзіліся толькі сэнсарныя датчыкі, баявая частка не выкарыстоўвалася. Падчас выпрабаванняў пускі не праводзіліся, прататыпы толькі «збіралі звесткі аб навакольным асяроддзі» і аб самім палёце. Акрамя таго, «былі сабраныя звесткі аб уздзеянні ўдараў і вібрацыі на саму зброю і вонкавае размяшчэнне ўзбраення на самалёце».

Таксама адзначаецца, што «такі тып збору звестак неабходны для ўсіх сістэм ўзбраення ВПС, якія знаходзяцца ў стадыі распрацоўкі».

Памочнік міністра ВПС ЗША па закупках, тэхналогіі і лагістыцы Уіл Ропер паведаміў аб выкарыстанні «прадастаўленых Кангрэсам паўнамоцтваў па найхутчэйшым стварэнні прататыпа» гіпергукавой зброі для ўзброеных сілаў краіны. Ён растлумачыў, што распрацоўка ARRW «праводзіцца ў сціснутыя тэрміны» разам з карпарацыяй Lockheed Martin, якая атрымала адпаведны кантракт ад Пентагона ў жніўні мінулага года. У ВПС ЗША чакаюць, што ARRW будзе гатовы да 2022 фінансавага года, які ў Злучаных Штатах пачынаецца з 1 кастрычніка.