Літва закупляе ёд праз увядзенне ў дзеянне БелАЭС
13- 29.06.2019, 20:31
- 14,327
Жыхарам тэрыторый каля Астравецкай АЭС раздадуць чатыры мільёны прэпаратаў.
У апошнім месяцы года запусцяць ядзерную рэакцыю на Беларускай АЭС пад Астраўцом. Гэта будзе ўключэнне першага энэргаблока ў энэргасістэму, пацвердзіў ранейшыя намеры віцэ-прэм'ер Беларусі Ігар Ляшэнка, паведамляе «Белсат».
Пакуль Беларусь рыхтуе зарадныя станцыі, суседняя Літва закупляе ёд, які распаўсюдзіць на блізкіх да АЭС тэрыторыях.
Літоўскі гарадок Міцкунай з маляўнічым возерам - за 18 км ад беларускай мяжы. 22 км направа - рыхтуецца да старту беларуская атамная станцыя. У сувязі з гэтым урад Літвы забяспечыць мясцовых жыхароў ёдзістым каліем.
«Калі своечасова прымяніць гэты прэпарат, то рызыка захварэць ракавымі захворваннямі крыві і шчытападобнай залозы зніжаецца», - кажа віцэ-міністр аховы здароўя Літвы Альгірдас Шэшэльгіс.
Праз арганізацыі самакіравання і паліклінікі чатыры мільёны таблетак атрымаюць усе жыхары літоўскай тэрыторыі за трыццаць кіламетраў ад станцыі.
І вось, што літоўцы распавялі журналістам:
«Мы ўсе выдатна памятаем Чарнобыль. Нездарма цяпер будуць раздаваць гэтыя ёдавыя таблеткі. Гэта значыць Фукусіма, Чарнобыль і гэтак далей».
«Вазьму на ўсялякі пажарны. Вядома не хацеў бы браць, але трэба. Калі ўсім раздаюць, значыць нешта можа здарыцца».
Вільня адмовілася набываць беларускую атамную энэргію і нават не дазволіць яе транзіт. Шырокае будзе толькі інфармаванне, што рабіць у выпадку радыяцыйнага забруджвання.
У Беларусі прадпрыемствы таблетак не раздаюць, пераконваючы ў «абсалютнай бяспецы праекта». Першы энэргаблок запрацуе ўжо ў снежні. Другі - у наступным годзе. У Літве ж, акрамя ёднай страхоўкі, усталёўваюць прылады для вымярэння ўзроўню радыяцыі.