Выбары ва Украіне: «Слуга народа» заяўляе пра перамогу на ўсіх мажарытарных акругах Кіева

Таксама яны ўпэўненыя ў перамозе яшчэ ў дзвюх акругах у вобласці.

Ва Украіне ва ўсіх акругах у горадзе Кіеве перамаглі кандыдаты ад прэзідэнцкай партыі «Слуга народа». Пра гэта ў штабе партыі паведамілі на прэс-канферэнцыі пасля абвяшчэння вынікаў экзіт-полаў, паведамляе zn.ua.

«Ва ўсіх 13 акругах Кіева перамагаюць кандыдаты ад «Слугі народа». Таксама па двух «спецыфічных» акругах Кіеўскай вобласці лідзіруюць кандыдаты ад партыі, гэта Аляксандр Дубінскі і Вольга Васілеўская», - заявіў гендырэктар тэлеканалу «1 + 1» Аляксандр Ткачэнка.

Паводле звестак Нацыянальнага экзіт-полу на 18:00 на пазачарговых выбарах у Вярхоўную Раду дзявятага склікання праходзяць пяць партый. Такім чынам рэйтынг партый склаўся наступным чынам: «Слуга народа» - 43.9%, «Апазіцыйная платформа - За жыццё» - 11.5%, «Еўрапейская салідарнасць» - 8.9%, «Бацькаўшчына» - 7.6%, «Голас» - 6.3%.