Вялікабрытанія выступіла супраць вяртання РФ у G7
1- 21.08.2019, 20:48
- 9,102
Барыс Джонсан заявіў, што Вялікабрытанія падтрымлівае пазіцыю Нямеччыны.
Прэм'ер-міністр Вялікабрытаніі Барыс Джонсан заявіў, што не падтрымлівае вяртанне Расеі ў клуб высокаразвітых краін Вялікай сямёркі (G7).
Пра гэта ён заявіў на супольнай прэс-канферэнцыі з канцлеркай Нямеччыны Ангелай Мэркель, перадае The Guardian.
Адказваючы на пытанне аб магчымым вяртанні Расеі ў G7, ён сказаў, што гэта адно з пытанняў, дзе Вялікабрытанія падтрымлівае пазіцыю Нямеччыны.
Нагадаем, што ўрад Нямеччыны выступіў супраць вяртання Расеі ў кола развітых краін G7.
20 жніўня прэзідэнт ЗША Дональд Трамп заявіў, што «адназначна» падтрымаў бы вяртанне Расеі ў Вялікую васьмёрку (G8).
Крыніцы Reuters у дыпламатычных колах Францыі адзначылі, што вяртанне РФ у G7 залежыць ад прагрэсу ў выкананні Масквой менскіх пагадненняў для ўрэгулявання сітуацыі на ўсходзе Украіны.
У сваю чаргу, прэзідэнт Францыі Эмануэль Макрон мяркуе, што такі крок магчымы пасля ўрэгулявання крызісу ва Украіне.
Расея была выключаная з Вялікай васьмёркі ў 2014 годзе пасля анэксіі Крыма. З таго часу прадстаўнікі заходніх краін неаднаразова заяўлялі, што аднаўленне ўдзелу РФ у Вялікай васьмёрцы звязана з «крымскім пытаннем» і захаваннем Расеяй менскіх пагадненняў, якія прадугледжваюць спыненне канфлікту на Данбасе.
У клуб сямі высокаразвітых краін свету ўваходзяць ЗША, Японія, Нямеччына, Вялікабрытанія, Францыя, Італія, Канада.