Пасля скандалу ў Гомелі ў менскай школе збіраюць грошы на скрыні для мабільнікаў

Як вам ідэя?

Педагагічная грамадскасць максімальна адэкватна рэагуе на пагрозы, якія яскрава акрэсліў гомельскі скандал. Мянчук Кірыл паведамляе: на днях у чаце ягонай 142-й школы з'явілася паведамленне ад бацькоўскага камітэта аб тым, што неабходна здаць па 30 рублёў з класа, піша onliner.by.

На гэтыя грошы плануецца абсталяваць скрыначкі для захоўвання мабільнікаў.

«У сувязі з нядаўнімі падзеямі ў гомельскай школе актывізавалася пытанне аб вочках для сотавых тэлефонаў. Вочкі будуць закупляцца цэнтралізавана адміністрацыяй», - прыкладна так выглядала паведамленне.

- Як нам патлумачылі, у гэтыя скрыначкі дзеці будуць абавязаныя складаць тэлефоны, - распавядае Кірыл, у якога ў гэтай школе вучыцца дзіця. - Збіраюць не толькі ў нашым класе. Я так разумею, гэта каб дзеці не здымалі нічога лішняга...

Ён кажа, што, наогул, у школе і так заўсёды было забаронена карыстацца тэлефонамі на ўроках, дагэтуль гэтая забарона нікога асабліва не напружвала.

- На маёй памяці за шмат гадоў толькі адзін раз настаўніца забрала ў вучня мабільнік - яму проста нехта патэлефанаваў на ўроку, - Кірыл ведае пра гэты выпадак ад сына. - Пасля ўрока вярнула, і ўсё.

У гэтым выпадку гэтыя скрыначкі здаюцца бацьку школьніка дурным і шкодным захадам:

- Тэлефон з камерай будзе абсалютна нялішнім, калі дзеецца нейкае беззаконне. Прынамсі, дзіця будзе неяк абароненае ад несправядлівасці ў экстранай сітуацыі. Інакш проста нічога не давядзеш.

Але, напэўна, ёсць іншыя меркаванні.