У ізалятары ў Жодзіне - анэстэзіёлаг-рэаніматолаг РНПЦ дзіцячай хірургіі, які ратуе жыццё дзяцей

Мікалая Бручкоўскага затрымалі ў раёне стэлы, калі ён заступіўся за жанчыну.

Учора, 11 кастрычніка, на Маршы Гонару затрымалі анестэзіёлага-рэаніматолага РНПЦ дзіцячай хірургіі Мікалая Бручкоўскага. Ён лічыцца спецыялістам высокага класа, якія выратавалі жыццё дзяцей з цяжкімі парокамі развіцця, піша tut.by.

Калегі Мікалая Дзмітрыевіча Бручкоўскага распавядаюць, што з іх інфармацыі, якую яны даведаліся ад родных лекара, яго затрымалі ў раёне стэлы, калі ён заступіўся за жанчыну. З іх звестак, затым яго прывезлі ў Маскоўскі РАУС, а цяпер Мікалай Дзмітрыевіч у ізалятары ў Жодзіне.

У клініцы вельмі перажываюць за калегу, турбуюцца пра ягоны стан здароўя, кажуць, што на фоне хвалявання і без неабходных лекаў ён можа пагоршыцца ў кожны момант. Мікалаю Дзмітрыевічу 58 гадоў.

- Мікалай Дзмітрыевіч працаваў у Глуску хірургам, блізу 20 гадоў працуе ў цэнтры дзіцячай хірургіі. Дзякуючы яму многія дзеці, у тым ліку глыбока неданошаныя, з вельмі цяжкімі парокамі развіцця жывыя, - кажуць калегі.

Нагадаем, 11 кастрычніка затрымалі некалькі медыкаў. Напрыклад, вядомага сківічна-тваравага хірурга Андрэя Любецкага - лекара, які робіць унікальныя аперацыі пластыкі расколін цвёрдага і мяккага паднябення, расколін твару, каля 19 гадоў прапрацаваў у дзіцячай лякарні. Таксама быў затрыманы вядомы афтальмолаг, дырэктар сеткі медыцынскіх цэнтраў «Новае зрение», загадчык падраздзяленнем лазернай мікрахірургіі вока, лекар з больш чым 25-гадовым стажам працы Вадзім Мурашка. Сёння ён выйшаў з ЦІП на Акрэсціна.