Медыкі высветлілі, хто з перахварэлых на COVID-19 хутчэй губляе антыцелы

Даследаванне правялі ў Імперскім каледжы Лондана.

Людзі, якія хварэюць на каранавірус бессімптомна, хутчэй за ўсё, губляюць антыцелы раней, чым тыя, хто пераносіць захворванне ў лёгкай, сярэдняй і цяжкай форме. Да такой высновы прыйшлі навукоўцы з Імперскага каледжа Лондана і спецыялісты фірмы Ipsos Mori, піша Medical Express.

Праведзенае даследаванне таксама паказвае, што страта антыцелаў адбываецца павольней у людзей ва ўзросце 18-24 гадоў у параўнанні з тымі, хто старэйшы за 75 гадоў.

У даследаванні ўзялі ўдзел 365 тысяч выпадкова выбраных дарослых, якія праводзілі дома тры тэсты на антыцелы да COVID-19 у перыяд з 20 чэрвеня да 28 верасня. Вынікі паказалі, што колькасць людзей з антыцеламі знізілася на 26,5% за прыблізна трохмесячны перыяд. Пры гэтым колькасць медыцынскіх работнікаў, у якіх былі выяўленыя антыцелы, не змянілася з часам, што можа гаварыць аб паўторным або больш высокім першапачатковым уздзеянні віруса.

«Гэта буйное даследаванне паказала, што доля людзей з выяўленымі антыцеламі з часам зніжаецца», - адзначыла аўтарка даследавання Хелен Уорд.

Навукоўцы папярэдзілі, што дагэтуль шмат чаго застаецца невядомым аб доўгатэрміновым адказе людзей антыцеламі на вірус. «Застаецца незразумелым, які ўзровень імунітэту забяспечваюць антыцелы і як доўга гэты імунітэт захоўваецца», - адзначыў Пол Эліёт з Імперскай школы грамадскай аховы здароўя.