«Калі я з'явіўся на свет - пад маім акном за нашу краіну змагаліся тысячы герояў»

Арт-перфоманс, прысвечаны апошняму нядзельнаму маршу.

25 кастрычніка карнікі разганялі мірную акцыю. Быццам бы ўжо штодзённасць, але тады разгон і збіццё людзей праходзілі акурат пад сценамі радзільні, дзе знаходзяцца будучыя мамы з сардэчнымі захворваннямі, дзе на свет з'яўляюцца дзеці, піша Telegram-канал «Мая краіна Беларусь».

Страшна ад усведамлення таго, што мы жывём у краіне, дзе людзей выкрадаюць, забіваюць, пазбаўляюць волі за іх грамадзянскую пазіцыю. Невыносна, калі з'яўленне новага жыцця суправаджаецца не ласкавым голасам мамы, а выбухамі гранат і крыкамі болю.

Несумненна, дзеці, якія былі народжаныя ўвечары 25 кастрычніка, будуць жыць у новай, прыгожай і свабоднай Беларусі! А калісьці яны скажуць ужо сваім дзецям: «Калі я з'явіўся на свет - пад маім акном за нашу краіну змагаліся тысячы герояў, дзякуючы ім мы не ведаем страху і дыктатуры».

Арт прысвечаны падзеям 25 кастрычніка.