«Гэта толькі вяршыня айсберга»: хакеры распавялі, як будуць зрываць маскі з сілавікоў

Эксклюзіўнае інтэрв'ю байцоў «лічбавага фронту».

У эксклюзіўным інтэрв'ю kyky.org «кібер-партызаны» распавялі пра працу над сістэмай распазнання твараў сілавікоў пад балаклавамі, чаму не варта баяцца нападаў «контр-кібер-партызан» і як Беларусь унутры падзялілася на Паўночную Карэю і ЗША.

Пра з'яўленне «кібер-партызан» у Беларусі стала вядома ў пачатку верасня 2020 года разам са ўзломам сайта Упраўлення справамі прэзідэнта. Тады на галоўнай старонцы быў размешчаны БЧБ-сцяг і фатаграфія кіраўніка ведамства Віктара Шэймана з замацаванай на галаве елкавай цацкай-зоркай - у духу Веркі Сярдзючкі. Потым свавольствы працягнуліся, і партызаны ўзламалі сайт МУС, дзе ў раздзел зніклых без вестак трапілі Аляксандр Лукашэнка і міністр унутраных спраў Юрый Караеў. Далей - больш.

У няроўнай барацьбе ляглі сайты Гандлёва-прамысловай палаты, дзяржзакупак, МПЗ, сістэмы АРІП. Асаблівая ўвага была ўдзеленая рупару прапаганды. Онлайн-трансляцыі каналаў «Беларусь 1», «Беларусь 2», «Беларусь 3», «Беларусь 4», «Беларусь 5» і АНТ былі перапыненыя сцэнамі збіцця АМАПам пратэстуючых 9-11 жніўня. Далей байцы нябачнага фронту злілі ў сетку базы звестак супрацоўнікаў МУС, АМАП, КДБ.

На канец верасня ў Беларусі з'явіўся цэлы «лічбавы IT-фронт» са сваім маніфестам. Яго асноўны пасыл - аб'яднанне хакераў і распрацоўшчыкаў для дыстанцыйных нападаў на адміністрацыйныя рэсурсы Беларусі, якія шкодзяць грамадству. «Кібер партызаны» сталі настолькі папулярныя, што сёння ў іх з'яўляюцца нават пераймальнікі.

KYKY: У адным са сваіх інтэрв'ю вы сказалі, што ваша мэта - «аднавіць справядлівасць, націснуць на рэжым Лукашэнкі». Але што рэальна дае падзенне дзяржсайтаў на некалькі гадзін, акрамя тролінгу?

К.: Гэта дэманстрацыя нашай сілы. Лічыце, гэта як вайсковыя вучэнні. Мы хочам паказаць, што мы на сваёй тэрыторыі, хай і віртуальнай, маем перавагу. Гэта і абазначэнне пазіцыі: мы на баку народа. Мы робім тое, у чым моцныя. Тролінг - гэта пабочны эфект. Асноўны пасыл - дзяржаўная машына перад намі бяззбройная, як беларускі народ - перад АМАПам.

KYKY: На які сайт будзе зробленая наступная атака?

К.: Узлом сістэм - творчы працэс. Мы не спыняемся, працуем над дзясяткамі дзяржаўных сістэм. Планы свае цяпер не афішуем.

KYKY: Ці не баіцеся адказнасці за свае дзеянні? Бо, фактычна, вам пагражае крымінальны пераслед.

К.: Мы гэтак жа, як і ўвесь народ, верныя сваім перакананням. Бяздзейнічаць мы не можам з ідэалагічных прычын і ўсяляк будзем падтрымліваць пратэст, нягледзячы на магчымы крымінальны пераслед.

KYKY: Ці не баіцеся, што вас раскрыюць?

К.: Структура нашай арганізацыі зробленая так, што калі і раскрыюць некалькі чалавек - гэта будзе толькі вяршыняй айсберга. Мы дэцэнтралізаваныя і аўтаномныя.

KYKY: Вам паступалі пагрозы, ці адчуваеце, што вам селі на хвост?

К.: Не, толькі ўскосныя і публічныя папярэджанні.

Тут добрая аналогія з Паўночнай Карэяй і ЗША. Мы - ЗША, а прыхільнікі рэжыму - Паўночная Карэя, якая ганарыцца, што іх катапульты для кідання камянёў - самыя хуткія.

Такім жа пацешным з'яўляецца і заява МУС, што ва ўсіх чатах тэлеграма знаходзяцца іх супрацоўнікі, як і ператварэнне МУС у SMS-спамераў.

KYKY: Вы першымі заявілі, што відэа, што быццам нейрасеціва зрывае з сілавікоў маскі - фэйк. Навошта? Гэта ж таксама метад запалохвання сілавікоў, хай і выдуманы.

К.: Мы паставілі пад сумнеў гэты ролік, бо тое, што мы ўбачылі, моцна цягнула на мантаж. Але ў гэты момант мы прызнаем, што тэхналогія існуе. І самі распрацоўваем гэтую сістэму.

KYKY: Навошта вы злілі базу сілавікоў за 2017-2019 гады? Многія людзі з гэтых спісаў ужо не працуюць у органах. Тым самым вы маглі падставіць невінаватых.

К.: Мы ўсведамляем палітычную глыбіню падобных раскрыццяў і стараемся максімальна дазавана выдаваць інфармацыю, правяраем яе. Мы заклікаем сілавыя ведамствы заставацца ў рамках закона - нельга падпарадкоўвацца злачынным загадам. І калі б яны ўспомнілі, што абараняць трэба народ, а не злачынцаў ва ўладзе - у такіх злівах не было б неабходнасці.

KYKY: Вы ўзламалі сайты БТ і АНТ. Ці ёсць тэхнічная магчымасць улезці ў сетку вяшчання? Альбо гэта ў прынцыпе тэхнічна немагчыма?

К.: У нашым асяроддзі існуе ўстойлівае перакананне, што няма такіх сістэм, якія немагчыма ўзламаць. Ёсць толькі пытанне цаны ўзлому.

KYKY: Ці можна ўзламаць асабістыя старонкі ў сацсетках высокіх чыноўнікаў? Ці гэта нерэальна?

К.: Як і казалі - узламаць магчыма. Але мы не бачым у гэтым практычнага сэнсу - гэтая інфармацыя не мае цікавасці. Пакуль у нас у прыярытэце іншыя задачы.

KYKY: Днямі з'явіліся і «Контр-кібер-партызаны». Яны ўзламалі сайт KYKY, пасля чаго на галоўнай старонцы з'явіўся партрэт Лукашэнкі і аўдыёфайл. Зменены голас зачытаў, што сілавікі не баяцца «Кібер-партызан». Як вы збіраецеся супрацьстаяць гэтай новай IT-групоўцы? Ці станіце на абарону тых кампаній і сайтаў, якія яны «пакладуць»?

К.: У нас ёсць інфармацыя, хто за гэтым стаіць. І турбавацца з гэтай нагоды не трэба. Расцэньвайце ўзлом KYKY як бясплатную рэкламу.

KYKY: Ацаніце іх прафесійны ўзровень - яны могуць вам скласці годную канкурэнцыю?

К.: Няма сэнсу дэталёва адказваць на гэтае пытанне. Мы на адным баку - ніхто з намі канкураваць не збіраецца.

KYKY: Вас часта крытыкуюць, што вы часцей раздаяце інтэрв'ю, чым ладзіце хакерскія атакі. Што вы можаце на гэта адказаць?

К.: Мы нікому нічога не вінныя. Атакі немагчымыя без планавання і патрабуюць шмат часу. Інтэрв'ю важныя для пазіцыянавання ў грамадстве і спрыяюць далучэнню новых аднадумцаў да нашага руху. Усё гэта не дзеля хайпу, а дзеля перамогі.

KYKY: У вас ёсць магчымасць публічна звярнуцца да ўлады, сілавікоў і асабіста Лукашэнкі. Што б вы ім сказалі?

К.: Мы ўсё выказалі ў сваім маніфесце.

KYKY: Калі ўсё скончыцца і рэжым падзе, вы раскрые свае асобы?

К.: Мы застанёмся тымі, каго вы паўсядзённа бачыце на вуліцы, у транспарце, у краме ці на стадыёне. Вы ніколі не даведаецеся імёны тых, хто рызыкаваў сваёй свабодай дзеля агульнай перамогі. Няма неабходнасці звязваць рух «Кібер-партызан» з канкрэтнымі асобамі.