Адвакат Віталя Шклярава паведаміў пра рэзкае пагаршэнне яго здароўя

У палітвязня посткаранавірусны сіндром.

Адвакат затрыманага 29 ліпеня паліттэхнолага Віталя Шклярава Антон Гашынскі паведаміў пра рэзкае пагаршэнне стану здароўя свайго падабароннага пасля перанесенага ім у СІЗА каранавіруса, піша tut.by.

- Лячэнне яму ніхто не праводзіў. Фактычна перанёс захворванне без адзінай таблеткі. Пасля хваробы ён вельмі моцна схуднеў. А ў пятніцу стала вядома, што ў яго посткаранавірусны сіндром: пачаліся праблемы з сэрцам, арытмія (збой сардэчнага рытму), моцныя болі ў грудзях, бессань. Сёння пры наведванні СІЗА адвакатам яго не вывелі. Заўтра буду спрабаваць яго раніцай наведаць. Не ведаю, ці будзе ён жывы, - кажа Гашынскі.

Раней паведамлялася, што ў верасні ў затрыманага некалькі дзён трымалася высокая тэмпература. Гашынскі паведаміў, тэст Шклярава на COVID-19 паказаў наяўнасць антыцелаў, так што верагодна, што ён у пачатку верасня перахварэў на каранавірус. Пры гэтым ні яго, ні сукамернікаў не ізалявалі, кажа адвакат.