Экс-прэзідэнт Кыргызстана Атамбаеў пераведзены пад хатні арышт

З СІЗА яго вызвалілі пратэстоўцы.

Былы прэзідэнт Кыргызстана Алмазбек Атамбаеў, які праходзіць галоўным фігурантам паводле справы аб беспарадках у сяле Кой-Таш у жніўні 2019 года, пераведзены з-пад варты пад хатні арышт. Такую пастанову аб змене меры стрымання прыняў суд Першамайскага раёна Бішкека ў аўторак, 6 кастрычніка, піша "Нямецкая хваля".

У чэрвені Атамбаеў быў прызнаны вінаватым у карупцыі паводле справы аб незаконным вызваленні крымінальнага аўтарытэта Азіза Батукаева і прысуджаны да 11 гадоў і двух месяцаў пазбаўлення свабоды. Старшыня Дзяржаўнай службы выканання пакарання Кыргызстана Калыбек Качкыналіеў атрымаў паводле той самай справы два гады пазбаўлення волі. Суд таксама прыняў пастанову аб канфіскацыі маёмасці Атамбаева і пазбаўленні яго дзяржаўных годнасцяў і ўзнагарод.

4 кастрычніка ў Кыргызстане прайшлі выбары ў парламент, пасля абвяшчэння выніку якіх у краіне ўспыхнулі пратэсты. У іх удзельнічаюць, прыхільнікі Сацыял-дэмакратычнай партыі Кыргызстана, якая падтрымлівае Атамбаева. Яны таксама патрабавалі ягонага вызвалення з СІЗА. 6 кастрычніка Цэнтральная выбарчая камісія Кіргізіі надумала прызнаць вынікі парламенцкіх выбараў у рэспубліцы несапраўднымі.