Золатавалютныя рэзервы «таракана» ўпалі да парогавага ўзроўню

Паказчыкі ЗВР знізіліся да мінімальнага значэння з красавіка 2019 года.

Золатавалютныя рэзервы Беларусі на 1 кастрычніка склалі 7 321,4 млн даляраў і знізіліся да мінімальнага значэння з красавіка 2019 года, паведамляюць naviny.by.

Асноўныя кірункі грашова-крэдытнай палітыкі на 2020 год разлічваюць, што міжнародныя рэзервовыя актывы на 1 студзеня 2021 года павінны скласці не менш як 7,3 млрд даляраў.

«За верасень 2020 года золатавалютныя рэзервы знізіліся на 136,4 млн даляраў ЗША (на 1,8%) пасля зніжэння ў жніўні на 1 399,6 млн даляраў ЗША (на 15,8%)», - паведамляе Нацыянальны банк.

Са звестак рэгулятара, зніжэнне ўзроўню рэзерваў у верасні «у асноўным абумоўлена планавай выплатай урадам знешніх і ўнутраных абавязацельстваў у замежнай валюце на суму 299,7 млн даляраў, а таксама памяншэннем кошту манетарнага золата».

Падтрыманню ўзроўню золатавалютных рэзерваў у верасні, паведамляе Нацбанк, спрыялі купля банкам замежнай валюты на ўнутраным рынку, а таксама паступленне замежнай валюты ў бюджэт.

Замежныя аналітыкі мяркуюць, што да канца года золатавалютныя рэзервы Беларусі могуць апусціцца ніжэй за мэтавы паказчык (7,3 млрд даляраў), які ў асноўных напрамках грашова-крэдытнай палітыкі вызначыў Нацбанк Беларусі.

«Па нашых разліках, да канца бягучага года аб'ём золатавалютных рэзерваў краіны можа апусціцца ніжэй за 7 млрд даляраў, у тым ліку праз неабходнасць выплаты і абслугоўвання дзяржаўнай завінавачанасці», - гаворыцца ў вераснёвым аглядзе, які падрыхтавалі аналітыкі Еўразійскага банка развіцця.

На 1 студзеня золатавалютныя рэзервы Беларусі складалі за 9 млрд 393,5 млн даляраў. Такім чынам, з пачатку года яны знізіліся больш чым на 2 млрд даляраў.

У гэтым годзе рэзервы двойчы істотна зніжаліся: у сакавіку - на 1 018,4 млн далараў, у жніўні - на 1 399,8 млн. Зніжэнне рэзерваў было абумоўлена ростам дэвальвацыйных чаканняў, якія, на думку эканамістаў, у сакавіку былі выкліканыя пандэміяй, а ў жніўні - палітычным крызісам. Істотнае павелічэнне рэзерваў назіралася толькі ў чэрвені - дзякуючы продажу еўрабондаў рэзервы Беларусі за першы летні месяц павялічыліся на 916,3 млн даляраў.