Пашынян дапусціў, што Арменія можа не прызнаць Нагорны Карабах

Ерэван разглядае розныя варыянты развіцця сітуацыі.

Арменія разглядае пытанне прызнання Нагорнага Карабаха, але тая ці іншая пастанова будзе прынятая пасля аналізу сітуацыі, заявіў прэм'ер-міністр Арменіі Нікол Пашынян, паведамляе "Інтэрфакс".

"Калі наш аналіз прывядзе да таго, што гэта дапаможа Карабаху і развязанню пытання, мы зробім такі крок, калі не, мы ўстрымаемся ад такой пастановы. Мы цяпер у працэсе абмеркавання", - сказаў Пашынян у адказе на пытанне, ці дапаможа Карабаху прызнанне Арменіі.

Пашынян дадаў, што Ерэван пры разглядзе гэтага пытання ўлічвае і міжнародны аспект. "Вядома ж, лічымся з тым, што нам трэба быць максімальна канструктыўнымі чальцамі міжнароднай супольнасці", - сказаў армянскі прэм'ер.

30 верасня Пашынян ужо заяўляў, што Арменія разглядае магчымасць прызнання незалежнасці Нагорнага Карабаха. З ягоных слоў, ёсць таксама варыянт падпісання пагаднення аб стратэгічным супрацоўніцтве паміж Арменіяй і Карабахам, ёсць магчымасць падпісання дамовы аб супрацоўніцтве ў сферы бяспекі і абароны.