Астраномы адшукалі планеты, якія могуць падыходзіць для ўзнікнення жыцця больш, чым Зямля

Аўтары працы праводзілі пошук сярод 4500 вядомых экзапланет за межамі Сонечнай сістэмы.

Наша планета можа быць зусім не самай лепшай па сваіх умовах у Сусвеце. Даследнікі пад кіраўніцтвам Дзірка Шульцэ-Макуха з Вашынгтонскага ўніверсітэта выявілі 24 планеты за межамі Сонечнай сістэмы, умовы на якіх могуць выявіцца больш падыходнымі для жыцця, чым на Зямлі. Артыкул пра гэта апублікаваны ў выданні Astrobiology, піша Naked science.

У працы падрабязна апісваюцца характарыстыкі патэнцыйна «звышзаселеных» планет, як іх назвалі навукоўцы. Некаторыя з іх прыкметна большыя, крыху цяплейшыя і, напэўна, больш «вільготныя» за Зямлю. Яны таксама круцяцца вакол адносна стабільных зорак, працэсы ў нетрах якіх менш інтэнсіўныя, чым у Сонца.

Усе 24 галоўныя прэтэндэнты на «звышзаселенасць» знаходзяцца на адлегласці, большай за 100 светлавых гадоў ад нас, што робіць назіранні за імі досыць складанымі. Аднак аўтары працы мяркуюць, што скаардынаваныя намаганні некалькіх астранамічных місій дазволяць падрабязна вывучыць аб'екты. Асаблівую надзею ўскладаюць на касмічныя апараты, якія павінны запусціць у найбліжэйшыя гады, такія як тэлескоп імя Джэймса Уэба, а таксама тэлескопы LUVOIR і PLATO.

Аўтары працы праводзілі пошук сярод 4500 вядомых экзапланет за межамі Сонечнай сістэмы. Даследчыкі абралі планетна-зорныя сістэмы з падобнымі на Зямлю планетамі, якія круцяцца ў межах заселенай зоны вакол зоркі. Акрамя зорак G-класа, падобных Сонцу, навукоўцы разглядалі сістэмы з зоркамі спектральнага класа К. Яны крыху халаднейшыя, менш масіўныя і не такія зыркія, як Сонца, але маюць большы тэрмін існавання, што дае патэнцыйнаму жыццю на навакольных планетах больш часу на развіццё.

Што тычыцца планет, даследчыкі таксама ўлічвалі цэлы шэраг параметраў. Па-першае, каб жыццё магло зарадзіцца, планеты не павінны быць занадта старымі, інакш яны вычарпаюць сваё геатэрмальнае цяпло і не будуць мець ахоўных магнітных палёў. Напрыклад, Зямлі блізу 4,5 мільярда гадоў, але даследчыкі сцвярджаюць, што аптымальным месцам для жыцця з'яўляецца планета, узрост якой складае ад пяці да васьмі мільярдаў гадоў.

Па-другое, памер і маса таксама маюць значэнне. Больш буйныя, чым Зямля, планеты, будуць даўжэй захоўваць геатэрмальнае цёпла, а іх гравітацыя зможа ўтрымліваць досыць густую атмасферу. Ну і не варта забываць пра ваду і тэмпературныя ваганні каля паверхні. На разлікі даследчыкаў, сярэдняя тэмпература прыкладна на пяць градусаў Цэльсія вышэйшая за зямную разам з больш высокай вільготнасцю найбольш пераважная для зараджэння жыцця.

Сярод 24 аб'ектаў, адабраных аўтарамі даследавання, ніводзін цалкам не адпавядае ўсім крытэрам звышзаселенасці; аднак адна планета, са слоў навукоўцаў, валодае «чатырма крытычнымі характарыстыкамі», што робіць яе, магчыма, больш камфортнай для жыцця, чым наша родная планета.

«Часам цяжка перадаць гэты прынцып звышзаселенасці планет, бо мы думаем, што ў нас найлепшая планета, - рэзюмуе вядучы аўтар працы Дытэр Шульцэ-Макух. - Так, у нас ёсць мноства складаных і разнастайных формаў жыцця, і многія з іх могуць існаваць у экстрэмальных варунках. <...> Але гэта не значыць, што ў нас [на планеце] ёсць усё самае найлепшае».