Працаўнік «Беларуснафты»: Не хачу падаткамі карміць людзей, якія нас збіваюць

Сяргей Краўчанка ў канцы верасня звярнуўся ў відэа да сваіх калег.

Працаўнік «Беларуснафты» Сяргей Краўчанка з Рэчыцы, які ў канцы верасня запісаў відэазварот да сваіх калег, распавёў tut.by, чаму гэта зрабіў і што з ім зараз. «Не хачу сваімі падаткамі карміць людзей, якія нас збіваюць, таму заявіў пра страйк», - распавядае мужчына. Цяпер ён знаходзіцца не ў Беларусі. Кажа, што быў вымушаны з'ехаць праз боязь за сябе і сваіх родных. Ён распавёў, што разам з сям'ёй знаходзіцца ў «бяспечным месцы». У «Беларуснафце» паведамілі, што Сяргей Краўчанка пакуль не звольнены, бо на прадпрыемстве «дзейнічаюць у рамках працоўнага заканадаўства».

Сяргей растлумачыў, чаму наважыў запісаць відэазварот да калег.

- Усё пачалося з перадвыбарнай кампаніі, у той перыяд мы з жонкай назіралі за тым, што адбываецца, нам гэта не падабалася. Але мы нічога не рабілі, мы былі апалітычныя. Усё пачалося з таго, як пачалі траўмаваць людзей, якія выходзілі з кветкамі на маршы салідарнасці. Самі пачалі ўдзельнічаць у падобных мерапрыемствах.

Сяргей паўтарыў, што яму крыўдна было глядзець за тым, што адбываецца ў краіне, «калі людзей збіваюць, калечаць і забіваюць». Канчаткова рашэнне запісаць відэазварот Сяргей прыняў, з яго слоў, калі прайшла інаўгурацыя.

- Я быў абураны, што, нягледзячы на тое што адбываецца ў гарадах Беларусі, прайшла інаўгурацыя. Для мяне гэта недапушчальна.

З яго слоў, сваім відэазваротам ён хацеў данесці, каб «людзі пасядзелі і прааналізавалі сітуацыю ў краіне». Сяргей распавядае, што на прадпрыемстве ён працаваў электраманцёрам абслугоўвання электраабсталявання, даводзілася ездзіць у працоўныя выправы. «Я размаўляў з работнікамі і не бачыў тых 80%, якія нібыта галасавалі, - кажа мужчына. - Большасць з працаўнікоў, па маіх назіраннях, ставіліся вельмі негатыўна да таго, што адбываецца ў краіне. Яны баяцца выказваць сваё меркаванне. Яны казалі, што нам гэта катэгарычна не падабаецца, але баяцца. У кагосьці крэдыты, у кагосьці дзеці, у кагосьці... І ў мяне ёсць крэдыты, жонка, двое маленькіх дзяцей. Але, нягледзячы на гэта, я наважыў паказаць сваю пазіцыю, што я супраць таго, што адбываецца, што мне баліць».

У сваім відэазвароце ён таксама заявіў, што мае намер сысці на страйк. «Не хачу сваімі падаткамі карміць людзей, якія нас збіваюць, - тлумачыў свае планы Сяргей.

Аднак фактычна страйкаваць не атрымалася. Праз некаторы час пасля таго, як быў надрукаваны ў Сеціве відэазварот, Сяргей разам з сям'ёй з'ехаў з краіны. Мужчына кажа, што гэта прыйшлося зрабіць праз боязь за сябе і сваіх родных і на тое былі падставы. Пры гэтым ён спадзяецца, што ў хуткім часе зможа вярнуцца ў Беларусь. «Спадзяюся, што маё відэа дастукаецца да работнікаў прадпрыемства. І нарэшце ўсё скончыцца і я змагу вярнуцца», - кажа Сяргей Краўчанка.

Нагадаем, відэа было апублікаванае 25 верасня. «Мы баімся выказаць сваё слова. Публічна. За сталамі мы ўсе размаўляем, і большасць супраць таго, што адбываецца цяпер. Не падманвайце сябе, мы ўсё гэта бачым, - адзначае ў ім Сяргей Краўчанка. - Мне балюча за тых людзей, якія дагэтуль не разумеюць, што адбываецца, і ўдвая крыўдна за тых людзей, якія разумеюць і сядзяць».