11 кастрычніка ў Менску пройдзе Марш Гонару

14:00, Менск - ад Нямігі да Стэлы, па ўсёй краіне - у цэнтрах гарадоў.

Незалежныя тэлеграм-каналы паведамілі пра тое, што ў нядзелю, 11 кастрычніка, у Менску і іншых гарадах Беларусі пройдзе Марш Гонару:

- Роўна два месяцы з пачатку пратэсту супраць нахабна скрадзеных выбараў - за новыя, сумленныя і сапраўдныя. Два месяцы ўпартай, штодзённай барацьбы за свае правы і будучыню. Два месяцы нязломнай волі ды бясстрашнасці ў супрацьстаянні самай бесчалавечнай дыктатуры Еўропы. Два месяцы новай гісторыі Беларусі. І гэта толькі пачатак.

Беларусы шмат даведаліся пра сябе за гэтыя два месяцы. Што мы здольныя аб'ядноўвацца дварамі і нават цэлай краінай. Што ў нас, такіх розных, так шмат агульных каштоўнасцяў. Што мы можам самі сачыць за чысцінёй нашых вуліц, за выкананнем нашых правоў і свабод, надаваць падтрымку бедным. Што мы сапраўды можам браць адказнасць за сябе і за краіну.

Мы даведаліся, што сярод нас так шмат крэатыўных, працавітых, бясстрашных людзей, якія адзін за аднаго гарой. Што мы здольныя выказваць нашу волю мірна, але няўмольна.

Два месяцы мы кожны дзень упарта змагаемся за свабоду і свае правы, нягледзячы на жахлівыя рэпрэсіі. Нягледзячы на ўсе спробы рэжыму раз'ядноўваць, запалохваць, душыць, прыніжаць і знішчаць. Улада доўга пераконвала, што мы інфантыльны, палахлівы, недаверлівы і безыніцыятыўны народ, які знікне без павадыра. І вось ужо два месяцы мы даводзім сабе і ўсяму свету, што гэта не так. Нам з вамі ёсць чым ганарыцца.

Таму ў нядзелю беларусы выйдуць на Марш Гонару. Мы зноў пакажам, што няўмольныя ў нашым імкненні да свабоды, развіцця, пераменаў. Мы зноў пацешымся багаццю светлых і смелых людзей вакол. Адзначым наша ўласнае свята: два месяцы новай Беларусі. Якую мы будуем сваімі рукамі, з гонарам і годнасцю. І мы не збочым назад.

У Менску традыцыйна збяромся на адрэзку ад Нямігі да Стэлы. Па ўсёй краіне - у цэнтрах вашых гарадоў.

НЯДЗЕЛЯ, 11 КАСТРЫЧНІКА, 14:00