Аляксандр Ярашук пра прапанову Лукашэнкі: Мы пацешымся, назіраючы за ўсім гэтым

Мінулы раз прапанова датычна прафесійных звязаў ператварылася ў прафанацыю.

Патрабаванне Аляксандра Лукашэнкі да канца года стварыць прафзвязныя арганізацыі на ўсіх прыватных прадпрыемствах пад пагрозай іх ліквідацыі з'яўляецца незаконным. Такое меркаванне ў каментары naviny.by выказаў старшыня Беларускага кангрэсу дэмакратычных прафзвязаў (БКДП) Аляксандр Ярашук.

«Няхай паспрабуе ліквідаваць, паглядзім, што з гэтага атрымаецца, – сказаў ён. – Гэта абсалютна незаконна. Прафзвязы – гэта грамадскія арганізацыі. Ніхто нікога не можа прымусіць або прымусіць стварыць у сябе грамадскую арганізацыю, тым больш калі гаворка ідзе пра прыватны сектар».

«Прафзвяз заўсёды ствараецца знізу праз добрую волю працаўнікоў, а не бізнэсу. Бізнэс стварае прафзвязы толькі ў тым выпадку, калі яму неабходныя «жоўтыя прафзвязы» (працоўныя арганізацыі, кіраваныя працадаўцам, якія не з'яўляюцца формай незалежных прафзвязаў і забароненыя Канвенцыяй Міжнароднай арганізацыі працы № 98. – заўв.), каб не з’явіліся сапраўдныя, якія могуць быць процівагай і з якімі не так проста будаваць дыялог», – дадаў Ярашук.

Паводле ягоных словаў, нават на дзяржаўных прадпрыемствах «ніхто нікога не мае права прымушаць ствараць прафзвязы», паколькі працаўнікі «выключна самі павінны гэта пастанавіць, добраахвотна».

Прафзвязны лідар адзначыў, што выкананне аналагічнага даручэння Лукашэнкі ў 2015 годзе «ператварылася ў прафанацыю». «На той момант прэм'ер-міністру Андрэю Кабякову даручылі стварыць цягам паўтара гадоў прафзвязы ў прыватным сектары эканомікі, – нагадаў ён. – Мы ведаем, як гэта было: уладальніка бізнэсу, фірмы, кампаніі ставілі перад фактам, што трэба стварыць прафзвяз. Ён клікаў якога-небудзь супрацоўніка або супрацоўніцу і казаў, маўляў, будзеш старшынёй прафзвязу, а той аднекваўся, але – трэба. Пасля такога ўсур'ёз разважаць, што гэта прафзвяз, не выпадала».

«Так гэта было ў лепшыя часы, калі рэжым кантраляваў сітуацыю ў краіне. Што да цяперашняга моманту, то яму трэба думаць не пра тое, як ствараць прафзвязы ў прыватным сектары эканомікі, а як забяспечыць сваю выжывальнасць, што з'яўляецца неразвязальнай задачай. Калі ён мяркуе, што цяпер гэта першачарговая задача, дае даручэнні і пагражае зачыніць прадпрыемствы, хай займаецца, а мы пацешымся, назіраючы за ўсім гэтым», – падсумаваў Ярашук.

Артыкул 2 закона «Аб прафесійных звязах» вызначае права грамадзянаў Беларусі «добраахвотна ствараць на свой выбар прафзвязы, а таксама ўступаць у прафзвязы пры ўмове выканання iх статутаў». Артыкул 4 гэтага ж закона абвяшчае, што «прыналежнасць або непрыналежнасць грамадзянаў да прафзвязаў не вынікуе якіх-небудзь абмежаванняў iх працоўных, сацыяльна-эканамічных, палітычных, асабістых правоў і свабодаў, гарантаваных заканадаўствам Рэспублікі Беларусь».

10 лістапада Лукашэнка на сустрэчы са старшынёй Федэрацыі прафзвязаў Беларусі (ФПБ) Міхаілам Ордам заявіў, што прыватныя прадпрыемствы, якія да канца гэтага года не створаць у сябе прафзвязныя арганізацыі, будуць ліквідаваныя.