Прамысловыя тавары ўсё больш асядаюць на складах

Складскія запасы б'юць рэкорды.

Чыноўнікі як могуць, развязваюць задачу для згладжвання падзення эканомікі. Пабочным эфектам з'яўляецца рост складскіх запасаў, піша сайт banki24.by.

Асноўны метад аператыўнай ацэнкі ВУП у Беларусі - вытворчы. Гэта значыць, што кожны месяц статорганы вызначаюць дададзеную вартасць агулам у краіне і ў асобных галінах эканомікі.

Вядома, што прэм'ер Галоўчанка хоча дамагчыся нулявога падзення ВУП за 2020 год. Самы прымітыўны спосаб гэта зрабіць - нарасціць выпуск прадукцыі, што аўтаматычна падыме дададзеную вартасць.

У сферы паслуг адміністрацыйна нарасціць выпуск вельмі складана, бо цяжка прымусіць пакупніка спажыць паслугі, калі яны здаюцца кліенту лішнімі.

Ручное нарошчванне выпуску значна лепш працуе ў сферы вытворчасці. Тыповым прыкладам з'яўляецца прамысловасць, у якой да 80% прадпрыемстваў дагэтуль належыць дзяржаве. Дастаткова спусціць планы зверху ўніз і фабрыкі-заводы пачнуць выдаваць на-гара мора прадукцыі.

Праўда, у выпуску прадукцыі без аглядкі на жаданні і магчымасці пакупнікоў ёсць непрыемны пабочны эфект - прадпрыемствы завальваюць склады гатовай прадукцыяй і вымываюць абаротныя сродкі. На захоўванне марнуюцца грошы, а дэфіцыт абаротных сродкаў трэба кампенсаваць ці з прыбытку, альбо за кошт крэдытаў і пазык.

Мяркуючы па справаздачнасці за 9 месяцаў, прадпрыемствам-рэкардсменам з'яўляецца Беларускі металургічны завод у Жлобіне. На 1 кастрычніка 2020 года ў БМЗ кароткатэрміновыя абавязацельствы былі вышэйшымі за кароткатэрміновыя актывы на 2,892 млрд BYN.

Запасы гатовай прадукцыі ў прамысловасці да 1 кастрычніка склалі 5,057 млрд BYN, што эквівалентна 68,5% сярэднямесячнай вытворчасці. Калі параўноўваць з узроўнем складскіх запасаў на 1 кастрычніка за ўсю пяцігодку, то менавіта 2020 год выходзіць на першае месца.

Цікава, што такая сітуацыя назіраецца з лета, калі ў Беларусі змяніўся ўрад. У ліпені ўрад паспрабаваў скараціць запасы ўручную. Мінфінансаў размясціла аблігацыі на 200 млн BYN, а сродкі ад продажу пусцілі на куплю тэхніку для арганізацый АПК. Тым самым часткова разгрузілі склады ў машынабудаванні.

Асноўныя месцы канцэнтрацыі складскіх запасаў у прамысловасці - гэта Менск і Менская вобласць. У Менску складскія запасы склалі 1,256 млрд BYN, у Менскай вобласці - 1,297 млрд BYN.

У сталіцы блізу 1,003 млрд BYN запасаў мае дзяржсектар. Больш за ўсё замарожана на складах вытворцаў апаратуры (186,8 млн BYN), машынабудаўнікоў (304,1 мле BYN) і вытворцаў транспартных сродкаў і абсталявання (262,3 млн BYN).

У Менскай вобласці найбуйнейшыя запасы канцэнтруе Жодзіна (488,2 млн BYN), а таксама Барысаўскі (145,9 млн BYN), Менскі (165,8 млн BYN) і Пухавіцкі (109,1 млн BYN) раёны.