Даследаванне: Бізнэс цяпер надзвычай высока ацэньвае існыя рызыкі вядзення спраў у Беларусі

Інвестыцый чакаць не даводзіцца.

Апытанне прыватных кампаній, праведзенае Даследчым цэнтрам ІПМ, дэманструе нечаканыя высновы. Напрыклад, нягледзячы на пандэмію, бізнэс агулам станоўча ацэньвае сваё эканамічнае і фінансавае становішча цяпер. Дарэчы, як добрае або вельмі добрае сваё эканамічнае і фінансавае становішча ацэньваюць 36 і 39% апытаных прадпрыемстваў. У той жа час дрэнным або вельмі дрэнным яго ацэньваюць 21 і 25% адпаведна, паведамляе office life.

Аднак у бізнэсу пераважаюць песімістычныя чаканні што да сваіх перспектыў. Доля тых, хто чакае пагаршэння свайго эканамічнага становішча, склала 48,5%. Для параўнання: на паляпшэнне разлічваюць 14,6% апытаных.

Напрыклад, апытаныя кампаніі чакаюць скарачэння аб'ёмаў вытворчасці і продажаў у найбліжэйшыя два-тры месяцы. Гэта пацвярджаюць 39% рэспандэнтаў. На рост продажаў разлічваюць 18% прадпрыемстваў, у асноўным прамыслоўцаў.

Будаўнічыя кампаніі, якія ўдзельнічалі ў апытанні, паведамляюць, што забяспечаныя замовамі прыблізна на чатыры месяцы. Такі аб'ём партфеля заказаў адпавядае «нармальнаму» для такога часу года, але чаканні на будучыню негатыўныя.

Кампаніі гандлю і сферы паслуг прызнаюць некаторае зніжэнне продажаў за апошнія 2-3 месяцы. І мяркуюць, што гэта абвастрае канкурэнцыю. Пры гэтым кампаніі чакаюць далейшага зніжэння продажаў і, адпаведна, плануюць памяншаць закупы ў сваіх пастаўшчыкоў.

Характэрна, што, нягледзячы на негатыўныя чаканні аб змяненні аб'ёмаў вытворчасці, бізнэс не плануе прапарцыйна скарачаць занятасць. Больш за палову кампаній (57%) не чакаюць змены колькасці занятых у найбліжэйшыя 2-3 месяцы. У той жа час рыхтуюцца да скарачэння 29% кампаній.

Існыя ўмовы вядзення бізнэсу ў Беларусі апытаныя прадпрыемствы ацэньваюць негатыўна. Больш за палову рэспандэнтаў уважаюць існыя рызыкі вядзення бізнэсу занадта высокімі (54%). Астатнія апытаныя назвалі цяперашнія рызыкі проста высокімі (31%) або сярэднімі (14%). Ніводзін з апытаных прадстаўнікоў бізнэсу не ацаніў рызыкі як нізкія.

Бізнэс адзначае вельмі нізкую даступнасць фінансавання: на пытанне «Наколькі лёгка вашай кампаніі цяпер атрымаць крэдыт» больш за дзве траціны кампаній (69%) адказалі, што атрымаць фінансаванне цяпер складаней, чым звычайна.

Найбольш істотнымі перашкодамі для росту дзелавой актыўнасці ў Беларусі бізнэс уважае макраэканамічную нестабільнасьць і высокую нявызначанасць эканамічнага асяроддзя. Знікненне макраэканамічнай нестабільнасці з пераліку ключавых бар'ераў для развіцця бізнэсу было найважнейшым вынікам манетарнай палітыкі цяперашняй каманды Нацыянальнага банка, але спачатку пандэмія, а затым палітычны крызіс, які справакаваў падзенне даверу да ўлады агулам і да банкаўскай сістэмы, у прыватнасці, вярнулі гэтую праблему на парадак дня, гаворыцца ў аглядзе ІПМ.