Студэнтам паведамілі, што БДУ з 11 лістапада пераходзіць на дыстанцыйнае навучанне

Пераход на дыстанцыйнае навучанне звязаны з каранавірусам.

Другі раз за год універсітэт пераходзіць на дыстанцыйнае навучанне, прычына ўсё тая ж - каранавірус, паведамляе tut.by.

«Паважаныя калегі і студэнты, з 11 лістапада 2020 да 31 снежня 2020 года адукацыйны працэс арганізуецца з выкарыстаннем ІКТ з улікам эпідэміялагічнага становішча на факультэтах - загад рэктара ад 2020.11.10 №594-ОД. Дадатковая інфармацыя будзе праходзіць у чатах старастаў, бо працэс навучання будзе карэктавацца, асабліва для 1-га курса», - паведамляецца ў тэлеграм-канале «Дэкан ФПМІ БДУ».

Як паведаміла ў аўторак прэс-служба Міністэрства аховы здароўя, у Беларусі 108 300 чалавек са станоўчым тэстам на COVID-19. Прырост за апошні дзень - 1038 выпадкаў. Гэта рэкордная колькасць новых інфікаваных за ўвесь час распаўсюджвання інфекцыі, упершыню з канца лютага паказчык пераадолеў тысячны рубеж. За ўвесь перыяд распаўсюджвання інфекцыі на тэрыторыі краіны памерлі 1016 пацыентаў з каранавіруснай інфекцыяй - гэта плюс пяць чалавек за апошні дзень.