«Мы перайшлі да планамернай працы супраць рэжыму»

У барацьбу ўключылася ўсё грамадства.

Тэлеграм-канал «Баста!» апублікаваў ліст ад свайго падпісчыка:

«Калі з намі здарылася 9–11 жніўня, мы не разумелі, як у мірнай Беларусі можа такое адбыцца. Як адзін чалавек умудрыўся зладзіць ГЭТА! Тут, побач з намі, проста ў нашым жыцці, такім ціхім і мірным.

Мала таго, што ён цалкам страціў падтрымку народа, пацярпеў паразу на выбарах, дык яшчэ і так дрэнна гэта схаваў, што пра гэта даведаліся абсалютна ўсе. УСЕ. Настолькі, што любыя аргументы “за” здаюцца трызненнем.

Мора гвалту, ад выгляду якога ў дарослых мужыкоў слёзы ліліся градам, адкрываліся язвы, усё валілася з рук. І пасля гэтага ён пастанавіў, што мы сціпла прыкрыем вочы далонькай і скажам, што нічога не было? Мільёны адукаваных, паспяховых людзей?

Ён пачаў з намі ВАЙНУ. Спачатку ўсё выглядала абсурдам і трызненнем, а мы былі наіўныя і чакалі хуткай перамогі. Мы чакалі, калі да яго, нарэшце, дойдзе інфармацыя пра тое, што адбываецца. Але з разуменнем, што ўсё гэта свядомы генацыд, мы перайшлі да планамернай, плённай працы ўсяго грамадства супраць рэжыму».