Amnesty International патрабуе расследаваць гібель Рамана Бандарэнкі

Калі гэтага не адбудзецца, віна падзе на рэжым Лукашэнкі.

Міжнародная праваабарончая арганізацыя Amnesty International патрабуе расследаваць гібель беларуса Рамана Бандарэнкі. Заяву пра гэта дырэктаркі бюро арганізацыі датычна Усходняй Еўропы і Цэнтральнай Азіі Мары Стразэрс распаўсюдзіла яе прэс-служба, паведамляюць naviny.media.

«Улады Беларусі прадаўжаюць кіраваць з дапамогай тэрору, пераследуючы нязгодных, выкарыстоўваючы гвалт і кідаючы людзей у турмы. І тым не менш мы звяртаем да іх патрабаванне неадкладна пачаць больш хуткае, бесстаронняе і дбайнае расследаванне забойства Рамана Бандарэнкі з тым, каб змусіць вінаватых да адказнасці. Пакуль замест гэтага яны заяўляюць, што яго збілі “заклапочаныя грамадзяне”», – гаворыцца ў заяве.

На думку Стразэрс, «няма ніякіх сумненняў у тым, што Раман, як і сотні іншых, быў збіты супрацоўнікамі сілавых структураў». «І замест таго, каб даставіць яго ў лякарню, паліцыя затрымала яго. Невядома, што адбылося, пакуль ён знаходзіўся пад вартай, але на наступны дзень ён памёр у шпіталі», – адзначыла яна.

Прадстаўніца арганізацыі заклікала «пакласці канец гэтаму тэрору і выкрыць усіх вінаватых у здзяйсненні гэтых злачынстваў». «Калі гэтага не адбудзецца, гэта азначае, што сілы бяспекі пад камандаваннем Аляксандра Лукашэнкі будуць прадаўжаць ужываць самую жудасную тактыку рэпрэсій – бязлітасныя катаванні і нават забойствы – супраць уласнага народа», – мяркуе Стразерс.