У Тбілісі праходзіць мітынг з патрабаваннем правядзення новых выбараў

Гэта чацвёртая маштабная акцыя грузінскай апазіцыі.

У Тбілісі каля будынка парламента Грузіі ў цэнтры горада праходзіць масавая акцыя пратэсту з патрабаваннем правядзення новых парламенцкіх выбараў. Сярод пратэстоўцаў - сябры і прыхільнікі апазіцыйных партый і грамадзянскія актывісты. Да мітынгу далучыліся жыхары рэгіёнаў Грузіі, у ім удзельнічаюць некалькі тысяч чалавек. Пра гэта паведамляе "Радыё Свабода".

Дэманстранты патрабуюць адстаўкі старшыні ЦВК Грузіі Тамары Жваніі, прызначэння новай выбарчай адміністрацыі, а таксама вызвалення ўсіх палітычных зняволеных, паведамляе агенцтва "Навіны-Грузія".

Выбары ў грузінскі парламент адбыліся 31 кастрычніка, паводле афіцыйных звестак, перамогу на іх атрымала кіроўная партыя "Грузінская мара". Апазіцыя, вядучая сіла якой - Адзіны нацыянальны рух былога прэзідэнта Міхаіла Саакашвілі - называе галасаванне сфальшаваным. "Грузінская мара" і апазіцыя пачалі перамовы аб развязанні палітычнага крызісу пры пасярэдніцтве ЗША і ЕЗ.

Тым не менш у арганізацыі мітынгу ўзялі ўдзел амаль усе апазіцыйныя партыі - як тыя, хто пасля выбараў праходзіць у парламент, так і тыя, хто набраў менш за адзін адсотак галасоў.

Сённяшні мітынг - чацвёртая маштабная акцыя пратэсту пасля выбараў. У нядзелю, 8 лістапада, дэманстранты адправіліся з праспекта Руставелі ў цэнтры горада да будынка ЦВК. Там для разгону маніфестантаў паліцыя ўжыла водныя гарматы. У выніку сутыкненняў пацярпелі 27 чалавек, 19 былі затрыманыя.