Калона з велізарным бел-чырвона-белым сцягам прайшла па цэнтры Львова

Многія ўкраінцы салідарныя з беларусамі, яны падтрымліваюць пратэст і вераць у перамогу народа.

Учора, 1 лістапада, беларусы і беларускі, якія знаходзяцца ў Львове, падтрымалі пратэстоўцаў у нашай краіне. З велізарным бел-чырвона-белым сцягам яны прайшлі па цэнтры гістарычнага Львова, піша сайт ex-press.by.

Варта адзначыць, што многія ўкраінцы салідарныя з беларусамі, яны падтрымліваюць пратэст і вераць у перамогу народа.

Настасся:

- Украіна моцна рушыла наперад пасля Рэвалюцыі Годнасці 2014 года. Адчуваецца, што апошнія гады тут былі рэалізаваны рэформы, у тым ліку ў грамадзянскай супольнасці. Людзі выходзяць на мітынгі, і паліцыя абараняе, а не збівае ўдзельнікаў. Абсалютна супрацьлеглае адбываецца цяпер у Беларусі. Гэта здаецца фантастычным.

Таццяна:

- Ва Украіне на мітынгах прысутнічаюць супрацоўнікі паліцыі. Яны не перапісваюць звесткі ўдзельнікаў, як гэта сёння было ў Вілейцы, не здымаюць вас на камеры. Тут няма размоў пра тое, што мы парушаем грамадскі парадак, таму што яны яго забяспечваюць.

Пра будучы мітынгу трэба загадзя паведаміць органам улады, каб не было, напрыклад, што ў гэтым месцы нехта яшчэ штосьці праводзіць.

Украінцы ўспрымаюць нас добразычліва, цікавяцца сітуацыяй у РБ, кажуць, каб «мацаваліся». Просяць зрабіць сэлфі або самі далучаюцца да мітынгу, крычаць «Жыве Беларусь» і шмат усміхаюцца.