Следчы камітэт распачаў крымінальную справу адразу на 231 удзельніка Марша ў Менску

Гэта 80% затрыманых пасля акцыі.

Следчы камітэт распачаў крымінальную справу адразу на 231 чалавека, паведамляе прэс-служба ўстановы. Яны прызнаныя «падазраванымі ў масавых беспарадках» у Менску 1 лістапада, паведамляе «Еўрарадыё». Адзначаецца, што гэта 80% затрыманых пасля Марша.

У гэты дзень у Беларусі адзначаліся Дзяды, у сталіцы прайшоў Марш супраць тэрору. Сілавікі жорстка разганялі мірных дэманстрантаў, выкарыстоўваючы светлашумавыя гранаты і іншыя спецсродкі.

У СК адзначаюць, што ў Менску затрымалі некалькі сотняў чалавек. «Іх дзеянні былі спалучаныя з яўным непадпарадкаваннем патрабаванням прадстаўнікоў улады і пацягнулі парушэнне работы транспарту і арганізацый. Таксама пашкоджаныя аб'екты гарадской інфраструктуры і аўтамабіль органаў унутраных спраў», - заяўляе прэс-служба СК.

Цяпер следчыя высвятляюць, хто яшчэ меў дачыненне да падзей 1 лістапада.

Можна меркаваць, што менавіта паводле гэтай справы выставілі абвінавачванне журналістам Змітру Солтану (Буянава), Змітру Краўчуку і Арцёму Багаслаўскаму.