Генерал ЗША заклікаў запрасіць Грузію ў NATO на фоне падзей у Карабаху

Гэтыя крокі дадуць Крамлю зразумець, што гэты рэгіён уяўляе для Захаду стратэгічны інтарэс.

Былы камандуючы наземнымі войскамі ЗША ў Еўропе генерал-лейтэнант Бэн Ходжас уважае, што на фоне падзей у Нагорным Карабаху варта неадкладна адправіць Грузіі запрашэнне далучыцца да NATO.

Пра гэта гаворыцца ў яго калонцы, апублікаванай у EUObserver, паведамляе «Европейская правда».

Са слоў Ходжаса, няздольнасць Захаду цалкам і паслядоўна канкураваць у вялікім Чарнаморскім рэгіёне ва ўсіх абласцях, уключаючы Паўднёвы Каўказ, дазволіла канфлікту ў Нагорным Карабаху аднавіцца.

«Мы саступілі ініцыятыву Крамлю і таму сёння знаходзімся ў баку, назіраючы за вынікам», - піша былы камандзір.

«Давайце пабудуем новыя, больш трывалыя адносіны з Арменіяй і Азербайджанам, умацуем наш даўні саюз з Турцыяй і ўмацуем нашу прысутнасць у Грузіі, уключаючы інфраструктуру для вайскова-паветраных сіл і вайскова-марскога флоту ЗША. Мы таксама павінны накіраваць Грузіі запрашэнне неадкладна далучыцца да NATO», - заявіў Ходжас.

З ягоных слоў, гэтыя крокі дадуць Крамлю зразумець, што гэты рэгіён уяўляе для Захаду стратэгічны інтарэс.

«Захад павінен спаборнічаць на Паўднёвым Каўказе, пакуль у нас ёсць магчымасць, калі мы хочам прадухіліць канфлікт паміж вялікімі дзяржавамі», - дадаў ён.