Першы штат ЗША адкрыў участкі для галасавання на выбарах прэзідэнта

Апошнія выбарчыя ўчасткі закрыюцца на Алясцы.

Штат Вермонт на ўсходзе ЗША першым адкрыў участкі для галасавання на выбарах прэзідэнта.

Пра гэта паведамляе ВВС.

Выбарчыя ўчасткі адкрыліся а 13:00 паводле Менску. З 1992 года Вермонт традыцыйна галасуе за дэмакратаў і партыя часта перамагае ў кожнай акрузе - хоць дзейны прэзідэнт Дональд Трамп перамог у адной акрузе ў 2016 годзе.

Вермонт таксама сярод 13 штатаў, якія гэтым разам выбіраюць губернатара. Дзейны Філ Скот, якога ўважаюць за ўмеранага рэспубліканца, мае адзін з найлепшых рэйтынгаў адабрэння ўсіх губернатараў ЗША. Падчас пандэміі ягоны і без таго высокі рэйтынг адабрэння дасягнуў 75%.

Скот быў гучным крытыкам прэзідэнта Трампа і заявіў, што не мае намеру галасаваць за яго.

Ягоным апанентам з'яўляецца кандыдат ад Дэмакратычнай партыі Дэвід Цукерман, які падтрымлівае прагрэсіўную палітыку, уключаючы падвышэнне мінімальнага заробку і легалізацыі марыхуаны. Цукерман падтрымаў Берні Сандэрса ў прэзідэнцкай гонцы 2020 года.

Першымі адкрыліся выбарчыя ўчасткі ў штаце Нью-Гэмпшыр - там галасаванне пачалося яшчэ апоўначы паводле мясцовага часу (8 раніцы па Менску), аднак гэта гістарычная традыцыя, а не правіла.

У іншых штатах участкі адчыняюцца пасля 14:00 паводле менскага часу - у залежнасці ад гадзіннага пояса.

Апошнія выбарчыя ўчасткі закрыюцца на Алясцы, на крайнім захадзе ЗША, калі на ўсходзе ўжо будзе раніца.

Варта адзначыць, што амерыканцы маглі прагаласаваць датэрмінова, і гэтым правам скарысталіся больш за 95 млн выбарнікаў. Гэта - рэкордная колькасць галасоў, аддадзеных датэрмінова, што складае 69% ад усяго прыходу на выбарах-2016.