Стартапы масава бягуць з Беларусі

Сaмыя папулярныя краіны для беларускіх стартап-кампаній - Украіна, Польшча, Літва.

Крызіс, які ўзнік у Беларусі пасля жнівеньскіх прэзідэнцкіх выбараў, негатыўна паўплываў на пераважную большасць стартапаў і прывёў да іх рэлакацыі за мяжу. Такія вынікі апытання, які стартап-хаб Imaguru правёў у кастрычніку сярод 208 заснавальнікаў і заснавальнікаў беларускіх стартап-кампаній, пішуць naviny.by са спасылкай на даследаванні Цэнтра дзелавых камунікацый БЕЛБІЗ.

Падчас апытання 71,2% рэспандэнтаў адзначылі, што найбольш негатыўна паўплываў на іх дзейнасць палітыка-эканамічны крызіс. 17,8% не змаглі адказаць, які фактар найбольш негатыўна на іх уплывае апошнім часам. 11% апытаных паведамілі, што самым галоўным негатыўным фактарам для іх сталася пандэмія.

Сярод найбольш частых наступстваў палітычнага крызісу стартапы, якія ўжо адчулі яго ўплыў, адзначаюць зніжэнне эфектыўнасці працы персаналу (80%), немагчымасць выконваць сваю працу праз блакаванні інтэрнэту ў краіне (33%), затрыманне супрацоўнікаў (32%), удзел персаналу ў акцыях пратэсту (26%), неабходнасць ужывання тэрміновых захадаў у рэлакацыі бізнэсу (22%).

Стартапы, якія ўжо адчулі ўплыў крызісу, адзначылі самыя негатыўныя наступствы для бізнэсу - непрацуючая заканадаўчая сістэма і адсутнасць прававой абароны (56%), гвалт і забойствы мірных грамадзян (56%), страта даверу да ўлады і палітычны крызіс (47%), крымінальныя справы супраць супрацоўнікаў стартап-кампаній (47%), магчымасць сітуацыі, пры якой невядомыя ў масках могуць уварвацца ў офіс, арыштаваць супрацоўнікаў і выключыць тэхніку без законных падстаў (45%).

Вынікі апытання паказалі: пастанову аб рэлакацыі бізнэсу ўжо прынялі 45% ад апытаных беларускіх стартапаў і большасць (64%) з тых, хто ўжо адчуў негатыўныя наступствы крызісу на сваім бізнэсе, выкліканага падзеямі жніўня-верасня. З іх 49% кампаній перамясціліся цалкам або часткова, адпаведна, найбліжэйшым часам плануюць пераехаць 51%.

Пра гатоўнасць прадаўжаць бізнэс у Беларусі і змагацца за свае правы заявілі 31,5% стартап-кампаній, і толькі 1,4% апытаных (тры кампаніі) паведамілі, што іх усё задавальняе ў Беларусі.

Вынікі апытання сведчаць, што самыя папулярныя краіны для беларускіх стартап-кампаній - Украіна, Польшча, Літва і іншыя краіны ЕЗ.

У каментары вынікаў даследавання, заснавальніца стартап-хаба Imaguru Таццяна Марыніч адзначыла, што палітыка-эканамічны крызіс сур'ёзным чынам паўплываў на стартап-кампаніі.

«Адключэнне інтэрнэту, невыносная рабочая абстаноўка, запалохванне і пераслед супрацоўнікаў, ператрусы, жорсткае абыходжанне сілавікоў з грамадзянамі, якія мірна выказваюць сваю пазіцыю, вымушаюць многія кампаніі пераехаць», - сказала Марыніч.

Яна таксама адзначыла, што ў выгнанні кампаніі прадаўжаюць падтрымліваць ініцыятывы грамадзянскай супольнасці.

«Мы ўсё часцей чуем гісторыі рэлакацыі кампаній, абурэнне арыштамі супрацоўнікаў тэхналагічнага бізнэсу, у тым ліку гучнай гісторыяй PandaDoc, а таксама маўчаннем кіраўніцтва Парку высокіх тэхналогій і ўдзелам у фальшывай інагурацыю ілжэпрэзідэнта», - заявіла Марыніч.