Працаўнікі «Гродна Азота» выказаліся пра сітуацыю на заводзе

На прадпрыемстве абвастраецца сітуацыя з кадрамі.

Два работнікі «Гродна Азота» ўчора далучыліся да страйкавага камітэту. На прадпрыемстве ў некаторых цэхах абвастраецца сітуацыя з кадрамі: змены ўкамплектаваныя не цалкам. Пра гэта кажуць і самі работнікі, і кіраўніцтва завода, піша tut.by.

Работнікі «Гродна Азота»: «Не хачу працаваць, плаціць падаткі, каб за мае грошы куплялі кулі, каб расстрэльваць мой народ»

Адным з работнікаў, якія далучыўся учора да страйкавага камітэту «Гродна Азота», стаў аператар дыстанцыйнага пульта кіравання ў хімічнай вытворчасці цэха «Аміяк-3» Уладзімір Жураўкоў. Ён напісаў заяву аб тым, што далучаецца да страйку, і запісаў відэазварот да калег, ды і наогул да ўсіх беларусаў.

- Я вымушаны запісваць гэтую заяву, пакуль я знаходжуся на лістку непрацаздольнасці і пакуль я знаходжуся на волі. Я выдатна ўсведамляю, што ўсё гэта будзе доўжыцца нядоўга. Што я буду звольнены, нават нягледзячы на тое, што я знаходжуся на лістку непрацаздольнасці. Я ведаю, што я магу быць затрыманы, як і мае калегі, у кожны момант і арыштаваны з надуманых артыкулаў. На жаль, рэаліі нашага жыцця такія і мы з імі ўжо ўсе звыкліся, - кажа Уладзімір на відэа. - Я быў у ліку затрыманых 26-га чысла супрацоўнікамі АМАПа. Я сапраўды чуў гэтыя крыкі ў аўтобусе, хто мы і што мы для іх. І ведаеце, з імі складана паспрачацца. І яны ж маюць рацыю. Чаму мы не [...], калі мы пасля дубінак ідзём і працуем? На іх працуем, як яны і крычаць. Я асабіста бачыў, як хлопец быў проста збіты ў аўтобусе за тое, што ён спытаў: «Я што, злачынец?» Яму хутка далі зразумець, што тут не трэба быць злачынцам. Па людзях там тапталіся, па работнікам там тапталіся. І гэта ўсё цалкам наша віна і ваша віна. Мы ўсё гэта глытаем і трываем, мы ўсё гэта спускае і даруем.

Далей работнік апісвае сітуацыю, у якой апынуўся «Гродна Азот». Ён кажа, што «ўжо тыдзень у самых складаных і небяспечных цэхах, выбуха-і пажаранебяспечных цэхах працуюць цалкам неўкамплектаваныя змены. Нават напалову няма цяпер людзей. Заклікаюць людзей, якія не працавалі ў цэху 5-12 гадоў, без усялякіх экзаменаў і праверак ведаў».

- Цяпер для бяспечнага аварыйнага прыпынення ў выпадку чаго адсутнічае патрэбная колькасць персаналу. Я не буду казаць пра парушэнні Працоўнага кодэкса і пра ўсякія службовыя інструкцыі, бо ў гэтай краіне ўжо і на Канстытуцыю ўсім пляваць даўно, - працягвае Уладзімір.

Уладзімір распавядае пра свайго калегу Аляксандра Жука, якога забралі сілавікі, калі той ішоў на працу. Яму паставілі прагул і звольнілі за гэта. А Аляксандр атрымаў 30 дзён арышту.

- Немагчыма глядзець, што робяць з работнікамі культуры, работнікамі медыцыны, што робяць з легендамі нашага беларускага спорту. І ўсім пляваць. Усе ідуць усё адно і працуюць. Усе трасуцца, успамінаючы, што ў іх ёсць дзеці, бацькі.

Крыху пазней у сеціве з'явіўся відэазварот яшчэ аднаго работніка «Гродна Азота». Ён таксама далучыўся да страйкавага камітэту прадпрыемства. Дзмітрый Саковіч, апаратчык 6-га разраду, прапрацаваў на заводзе 26 гадоў.

- Я не хачу трываць тое беззаконне, якое адбываецца ў нашай краіне. Тое, як б'юць, прыніжаюць людзей, ставяцца зараз да студэнтаў, медыкаў, настаўнікаў, спартоўцаў, якія ва ўсім свеце абаранялі наш гонар, годнасць нашай краіны, - кажа мужчына на відэа.

Ён распавядае, што адбывалася 26 кастрычніка, калі да прадпрыемства прыехалі сілавікі, каб разабрацца з работнікамі.

- Я не думаю, што праца вышэй за гонар, сумленне чалавека. Я мяркую, што праца - гэта не самае важнае ў нашым жыцці. Застацца чалавекам значна важней, а не быць скотам, ісці на працу, апусціўшы галаву, калі цябе дубінкай гоняць і кажуць: «Ты павінен працаваць на нас!» Гэта прыніжэнне. Я дуамаю, што мой абавязак - далучыцца да гэтых хлопцаў. Я таксама напісаў заяву і з гэтай даты (2 лістапада) сыходжу ў страйк. Я не хачу працаваць, плаціць падаткі, каб за мае грошы куплялі набоі, кулі і ўсё астатняе для таго, каб расстрэльваць мой народ. Я не хачу! - сказаў на заканчэнне Дзмітрый Саковіч.